Êdi Ramanıñ Azärbaycanğa säfäre

Möxtäräm tıñlawçılar, Awraziya qaytawazı tapşıruınıñ çirattağı çığarılışın täqdim itäbez. bügenge tapşıruıbızda Albaniya prem’yer-ministrınıñ Azärbaycanğa yasağan säfärenä tuqtalırbız.

14-15nçe aprel’ könnärendä Albaniya prem’yer-ministrı Êdi Rama Azärbaycan Cömhüriyätenä räsmi säfär başqardı. 14nçe aprel’da Azärbaycan ilbaşı İlham Aliyev Albaniya xökümät räise Êdi Rama belän küreşte. Bu söyläşüdä ênergetika ölkäsendä xezmättäşlek belän ber rättän ike yaqlı mönäsäbätlär häm regional’ mäs’älälär qaraldı. Êdi Rama Azärbaycannı, ğadellekne, Azärbaycannıñ tarixi xaq-xoquqların härwaqıt xuplawların belderep, Azärbaycannıñ kürşe Ärmänstan belän tınıçlıq häm ozın möddätle xezmättäşlek qoruğa qarağan tırışlıqların täqdir itülären assızıqladı. Albaniya prem’yerı Törkiyäneñ Albaniya belän Azärbaycan arasındağı möhim küper buluın da belderde. Söyläşüdän soñ Albaniya prem’yer-ministrı däwlät başlığı İlham Aliyevnı ilenä çaqırdı.

Şul uq könne Albaniya prem’yer-ministrı Rama säfäre qısalarında Azärbaycanlı xezmättäşe Ali Asadov häm Parlament başlığı Sahibe Gafarova belän dä ayırım küreşep söyläşte. Asadov häm Rama säwdä häm iqtisad, ênergetika häm turizm ölkäsendäge xezmättäşlekne üsterü mäs’äläsen qaradı. Belüebezçä Albaniya häm Azärbaycan arasındağı urtaq säwdä küläme 2021dä 4 million 900 meñ dollar buldı. İke ilneñ parlamentlarara duslıq törkemnäre êşçänleklären däwam itterä.

Prem’yer-ministr Êdi Rama Baqıda Şähitlär ziratına da bardı.

Albaniya prem’yer-ministrı Êdi Rama kiläse yılnı Azärbaycan belän ike yaqlı mönäsäbätlär qorıluınıñ 30 yıllığın qotlayaçaqların häm Albaniyada Azärbaycan atnalığınıñ oyıştırılaçağın, ike yaqlı bularaq ilçeleklär açunıñ da möhim buluın belderde. Belengänçä Azärbaycannıñ Afinadağı ilçese şul uq waqıtta Tirana ilçese bularaq ta wazifa başqara. ike yaqlı bularaq ilçelekneñ açıluı strategik cähattän ike taraf öçen dä faydalı bulaçaq.

Awrupa illäreneñ Rusiyäneñ tabiğıy gazına bäylelekne azaytu kereşüläre kön tärtibendäge urının saqlap qala birgändä Azärbaycan tabiğıy gazınıñ Balkanğa êksportın arttıru tağın da möhim xälgä kilä. Awrupa illäre qoyaş, cil kebek yañartıla alınuçı ênergiyağa östenlek birergä teläsälär dä, monıñ qısqa waqıtta çınğa aşuı awır. Şunıñ öçen Xäzär ênergiya çığanaqlarınıñ Kön’yaq Tabiğıy gaz koridorı aşa könbatışqa êksportı monnan soñ kön tärtibendäge töp mäs’älälärdän berse bulırğa däwam itäçäk. Qayber belgeçlär citkergänçä Albaniya bu bäyläneştä Balkandağı möhim tranzit il bula ala. Çönki Albaniya - Kön’yaq Tabiğıy gaz koridorınıñ däwamı bulğan Trans Adriatik tabiğıy gaz ütkärgeçeneñ möhim ile.

Ayıruça Tirana citäkçelegeneñ ênergiyada könçığış belän könbatış arasında möhim tranzit il bulğan Törkiyä belän dä nıqlı mönäsäbätläre bar. Xäzär ênergiya çığanaqlarınıñ könbatışqa êksportınıñ arttırıluı mäs’äläsendä oyıştırıluı planlanğan Törekmänstan-Azärbaycan-Törkiyä öç yaqlı ilbaşları oçraşuı zur ähämiyätkä iyä. Belengänçä Azärbaycan häm Törekmänstan Xäzär diñgezendäge ênergiya çığanaqların büleşü mäs’äläsendä kileşte.

Albaniya häm Azärbaycan Berläşkän Millätlär Oyışması, Awrupa İminlek häm Xezmättäşlek oyışması, İslam xezmättäşlek oyışması kebek şaqtıy xalıqara oyışmalarda xezmättäşlekne üsterä.

Qısqası, Albaniya prem’yer-ministrı Ramanıñ Azärbaycanğa säfäre ike yaqlı häm regional’ yägni Qavqaz-Balkan xezmättäşlegen üsterü cähatennän uñdırışlı buldı.