İran belän Rusiyä dollardan baş tarttı

İran belän Rusiyä säwdä êşçänlegendä Amerika dolları urınına milli aqça berämlege qullanu mäs’äläsendä kileşte. 

İran räsmi agentlığı “İRNA”nıñ ilneñ Üzäk bankı mäğ’lümatlarına nigezlängän xäbärendä äytelgänçä, ike däwlätneñ säwdä äyläneşennän dollarnı çığaru turındağı kileşüenä Rusiyädä uzğan cıyılışta näticä çığarıldı. Anda AQŞ sankśiyäläre astındağı İran häm Rusiyä banklarınıñ monnan soñ cirle aqça berämlekläre belän êşçänlek başqaru öçen SWİFT tışındağı banklarara sistemalar qullana alacağı äytelä.

İke il üzara säwdädä dollarnı äyläneştän çığaru turındağı niyätlären 2022nçe yılnıñ iyül’ ayında beldergän ide.  Ul waqıtta İran liderı Ayatullax Ali Xamaney Rusiyä däwlät başlığı Vladimir Putin belän Tähranda oçraşqaç: “Dollar êtaplap global’ säwdä äyläneşe yulınnan çıqarğa tiyeş,”-digän ide. Putin isä moña cawap itep, AQŞnıñ dollarnı basım çarası şikelle qullanırğa tırışuın, İran belän Rusiyäneñ üzara milli aqça berämleklären qullanu yulların uylawın äytte.

İran 25nçe dekabr’dä Rusiyä citäkçelek itüçe Awraziya iq’tisadi berlege belän irekle säwdä kileşüe imzaladı.