Qıtay üz şirkätlären tıyuçı Kanadağa protest belderde

Pekin idaräśe Kanada xökümäteneñ Xuavey häm ZTE telekommunikaśion şirkätläreneñ cihazları häm xezmätlären qullanunı tıyuına protest belderde.

Qıtay säwdä ministrlığınnan citkerülärençä, Kanada citäkçelegeneñ milli iminlekne säbäp itep çığarğan qararı bernindi konkret dälilgä tayanmıy, bazar iq’tisadı häm irekle säwdä qağıydälären boza. Belderüdä monıñ Qıtay häm Kanada şirkätläreneñ mänfäğat’lärenä zarar biräçäge häm iq’tisadi mönäsäbätlärgä tiskäre yoğıntı yasayaçağı äytelä. Bu oçraqta Pekinnıñ qarşı çaralar kürü xoquqına iyä buluı da belderelä.

“Kanadanı illär arasındağı xezmättäşlekne raśional’ häm ob’yektiv räweştä qarap çığarğa häm yalğış adımnan kire qaytırğa çaqırabız,”-diyelä Qıtay säwdä ministrlığı belderüendä.

Kanada xökümäte 20nçe mayda çığarğan qararında Qıtay texnologiyä şirkätläre Xuavey häm ZTEnıñ ildä 5G çıbıqsız çeltären tözüe häm aña cihaz urnaştıruın, milli qurqınıçsızlıqnı säbäpçe itep, tıyğan ide.  

Monnan alda Amerika Quşma Ştatları, Angliyä, Bel’giyä, Şveśiyä, Yaña Zelandiyä häm Avstraliyä dä älege Qıtay şirkätläreneñ cihazları häm xezmätläreneñ 5G çeltärendä qullanıluın tıydı.