Kizü waqıtında Törkiyädän ciläk-cimeş êksportı artqan

Törkiyä ğinwar’-mart çorında yäş’ ciläk-cimeş häm yäşelçä êksportın uzğan yılnıñ şul uq çorına qarağanda 25%qa arttırıp, 637 million 722 meñ dollarğa citkerde.

Yaña tör koronavirus (Kovid-19) kizüe arqasında soraw-taläp artqan tarmaqlarnıñ başında torğan yäş’ ciläk-cimeş häm yäşelçädä êksport iñ küp yasalğan il isä tradiśion bazarlardan Rusiyä buldı. Bu çorda Rusiyägä başqarılğan yäş’ ciläk-cimeş häm yäşelçä êksportı 37%qa artıp, 200 million 758 meñ dollarğa citte.

Rusiyädän soñ 59 million 308 meñ dollar belän Rumıniya, 55 million 396 meñ dollar belän Ukraina tora.

Şuşı çorda iñ küp soraw-taläp artışı isä Awrupa illärennän buldı. Koronavirus arqasında iñ yuğarı däräcädä çaralar kürelgän İtaliyağa yäş’ ciläk-cimeş häm yäşelçä êksportı 82%qa artıp 4 million 85 meñ dollarğa citte.

Bel’giyägä yäş’ ciläk-cimeş häm yäşelçä êksportında isä 147% artış yäşände. Şuşı uq çorda Çexiyağa 50%qa, Niderlandqa isä 45%qa êksport artqan.

Şul uq waqıtta Amerika Quşma Ştatlarına yäş’ ciläk-cimeş häm yäşelçä êksportı da 104%qa artıp, ber million dollardan kübräk buldı.

Äzer êşlänmälär êksportında artu barışı mart ayında da däwam itte. Tuñdırılğan yäşelçädän tozlıqqa, ciläk-cimeş êçemlegennän qaynatmağa xätle şaqtıy êşlänmä bulğan "produkśiya kategoriyäse”ndä bıyıl berençe çirektä êksport uzğan yılnıñ şul uq çorına qarağanda 12%qa artıp, 421 million 212 meñ dollarğa citte.

Êşkärtelgän azıq-tölekkä soraw-taläp artqan şuşı barışta iñ küp produkśiya Germaniyädän soraldı. Ğinwar’-mart çorında Germaniyağa yasalğan êşlänmä êksportı uzğan yılnıñ şul uq çorına qarağanda 48%qa artıp, 69 million 173 meñ dollarğa citte. Bu ildän soñ 49 million 791 meñ dollar belän Ğiraq (Ğıyraq), 48 million 261 meñ dollar belän Amerika Quşma Ştatları tora.

Yaponiyağa yasalğan produkśiya êksportı isä 50% artış belän 9 million 300 meñ dollarğa citte.