AQŞta bäxäsle ülem cäzası

Amerika Quşma Ştatlarında berniçä könnän birle bäxäslärgä säbäpçe bulğan ülem cäzası tormışqa aşırıldı. Yuğarı mäxkämägä birelgän apellyaśiyä dä näticäsez qalğaç, il tarixında täwge tapqır mäxkümne azot belän ağulap üterdelär.

58 yäş’lek Kennet Yujin Smit 1989nçı yılda ber ruxaninıñ xatının üterüdä ğayeple dip tabıla häm ülem cäzasına xökem itelä. AQŞta älege qararnı 1982nçe yıldan birle täwge tapqır başqa törle yul belän tormışqa aşırdılar. Smitqa bitlek tağalar häm berniçä minut buyı azot belän ağulap üterälär.   

Ülem cäzasın başqaruğa qarşı tawış birgän 3 Yuğarı mäxkämä äğ’zasınnan berse - Sonya Sotomayor bolay di: “Alabama anı moña qadär hiç qullanılmağan ülem cäzası ısulı öçen “täcribä quyanı” itep sayladı. Dön’ya isä monı küzätä”.

Älege qararğa bik küp xalıqara oyışma rizasızlıq belderde. BMOnıñ keşe xoquqları ofisınnan yasalğan belderüdä “azot gazı belän tonçıqtıru”nıñ cäfalaw sanaluı häm keşeleksezlek buluı äytelde.

 Keşe xoquqların küzätü oyışması fänni nigeze bulmağan ısuldan kiçekmästän waz kiçärgä kiräklegen citkerde.