Finlyandiya Rusiyä belän çiklärne açarğa cıyınmıy

Finlyandiya xökümäte räise Petteri Orpo ileneñ Rusiyä belän çigen yabu qararınıñ tağın ber ayğa ozaytılaçağın belderde. Ul cirle telekanalğa interv’yusında çikneñ yabulı qaluı öçen citärlek mäğ’lümatqa iyä buluların äytte. “Qulımdağı mäğ’lümatlarğa qarağanda, Rusiyädä üzgäreş yuq. Yanaw qurqınıçınıñ da üzgärmäwen uylıym”,-dide ul.

Orpo Rusiyäneñ Ukrainadağı xärbi operaśiyäseneñ däwam itäçäge belän bäyle “açıq bilgelär häm yanaw” bulğanda çikneñ açılmayacağın citkerde. Anıñ äytüençä, xökümätneñ kiläse könnärdä könçığış çige belän bäyle yaña qarar birüe kötelä.  

Xel’sinki “Mäskäwneñ gibrid operaśiyäse” dip atağan sıyınuçılar mäs’äläse säbäple ike il arasında atnalar buyı däwam itkän kiyerenkelektän soñ Finlyandiyä 2023nçe yılnıñ 28nçe noyabrendä Rusiyä belän barlıq çigen waqıtlıça yaptı.

Xökümät räise Petteri Orpo ileneñ Rusiyä belän könçığış çigendäge Vaalimaa häm Niiraladağı 2 kontrol’ noqtasın 2023nçe yılnıñ 14nçe dekabrennän qabat açaçaqların beldergän ide. Alar 15nçe dekabr’dä açılsa da, wäqalätlelärneñ bik küp migrant kerüen beldergännän soñ, şul uq könne qabat yabıldı häm 14nçe ğıynvarğa qadär yabıq bulaçağı belderelde.