7 bäbine ütergän şäfqat' tutaşına ğomerlek törmä cäzası

Angliyaneñ Çester şähärendäge bala tudıru yortında êşläwçe şäfqat’ tutaşı Lyusi Letbi 7 bäbine üterüdä, 6ısın da üterergä cıyınuda ğayeplänep, ğomerlek törmä cäzasına tartıldı.

2015-2016 yıllarda “Countess of Chester” xastaxanäsendäge 7 bäbineñ üleme belän bäyle uzğan atnada bulğan mäxkämädä jyuri tarafınnan ğayeple tabılğan Letbi öçen Mançester şähärendä qarar utırışı uzdı.

Qararnı açıqlağan sud’ya Djeyms Goss mäxkämädä çığış yasap, Letbineñ 2015 yılnıñ iyun’ ayı – 2016 yılnıñ iyune arasında 7 bäbine üterüen, 6 bäbine üterergä cıyınuın, bolardan bersen isä ike atna ara belän 2 tapqır üterergä tırışuın citkerde.

Sud’ya Goss Letbineñ keşelek häm şäfqat’ tutaşına kileşmäwçe totışlarınıñ şul uq waqıtta keşelärneñ sälamätlek saqlaw oyışmalarına bulğan ışanıçına da zıyan saluın açıqladı.

Sud’ya mäxkämä qararın uqıp bolay dide: “Lyusi Letbi, cinayät’ häm cinayät’kä omtılışta ğayepläp, härberse öçen sine ğomerlek törmä cäzasına tartam. Çönki başqarğan cinayät’lär bik citdi. Şulay uq törmädän irtä çığu xökemnäreneñ dä ğamäldä bulmayacağına qarar birdem. Şunıñ öçen mäxkämäneñ qararı – härber cinayät’ öçen ğomerlek törmä. Qalğan tormışıñnı törmädä uzdıraçaqsıñ.”