Kaxovka böyäseneñ cimerelüe yoğışlı xastalıqlar kiterep çığarırığa mömkin

Bötendön’ya sälamätlek saqlaw oyışması ğomum mödire Tedros Adxanom Gebreyesus Ukrainada Kaxovka böyäseneñ cimerelüeneñ zur zıyan saluın belderde. Ul global’ sälamätlek saqlaw problemaları belän bäyle matbuğat cıyılışında älege temağa da tuqtaldı.

Gebreyesus Kaxovka böyäseneñ 6nçı iyün’dä şartlatılıp cimerelüe nisbätennän bolay dide: “Bu cimerü zur xaräbälärgä häm keşelärneñ ğazap çigüenä säbäpçe buldı. Bigräk tä, köçle su basular, keşelärneñ yäşägän urınnarınnan küçenüenä häm êkologik zıyanğa kiterde”.

Gebreyesus oyışmasınıñ, su belän yoğuçı xastalıqlarnı profilaktikalaw çaraları qısalarında, wäqalätlelär häm sälamätlek saqlaw xezmätkärlärenä yärdäm itüen belderde.

“Törkemnärebez waqıyğa urınında häm bu xäldän zarar kürüçelärgä bulışu öçen daimi räweştä mediśina ixtiyacların kontrol’ itälär,”-dide ul.

Bötendön’ya sälamätlek saqlaw oyışması aşığıç mediśina yärdäme wäqalätlese Teresa Zakaria isä bolay dip belderde: “Xäzerge mäğ’lümatlar iñ başta yılğa yarındağı 16 meñ keşeneñ turıdan-turı su basu qurqınıçı astında qaluın kürsätä. Meñnärçä keşe êvakuaśiyälände häm bu sannıñ artaçağın beläbez”.

Ul cirlektä çista suğa qıtlıq barlıqqa kilüen, regiondağı basu-qırlarnıñ qullanıp bulmas xäldä qaluı arqasında yaqın kiläçäktä azıq-tölek probleması tuaçağın äytte.

İsegezgä töşeräbez, Ukrainanıñ kön’yağındağı Xerson töbägendä Ruslar kontrol’ itüçe Kaxovka byäse häm gidroêlektr stanśiyäseneñ 6nçı iyün’dä bombağa totıluı xäbär itelde. Cirlekneñ su taşqınnarı arqasında zur êkologik hälakät belän oçraşuı belderelde.

Ukraina häm Rusiyä böyäneñ bombağa totıluında ber-berlären ğayepläde