İran belän Äfğanstan çik buyında bäreleş

İran belän Taliban köçläre arasında çik buyında bäreleşlär kilep çığuı häm ülüçelär barlığı turında belderelä.

 Fars mäğ’lümat agentlığınıñ cirlektäge çığanaqlarına tayanuçı xäbärendä äytelgänçä, waqıyğa İrannıñ Sistan-Belucistan töbäge Xirmend rayonındağı Sasulı poliśiyä bülege yänäşäsendä bula. Anda Talibannıñ çik buyı köçläre belän İrannıñ çik saqçıları arasında bäreleş çığa.

İrannıñ räsmi agentlığı İRNAnıñ xäbärendä isä çik buyındağı bäreleşlärdä 2 iranlı ğaskärineñ ğomere özelüe, 2 keşeneñ yaralanuı äytelä. Taliban köçläreneñ dä yuğaltular kiçerüe citkerelde.

Taliban waqıtlıça xökümäteneñ saqlanu ministrlığı İran xärbiläreneñ Nimroz töbäge Kang rayonındağı çik buyında ut açuı näticäsendä ike yaq arasında bäreleşlär çığuın belderä.

Taliban êçke êşlär ministrlığı wäkile Abdulnafi Täkur da Twitter akkauntındağı belderüendä bäreleş näticäsendä ike yaqtan da berär keşeneñ ülüen häm bik kübeseneñ yaralanuın citkerde.

İran belän Taliban arasında soñğı könnärdä Xilmend yılğasındağı sunı büleşü mäs’äläsendä kiyerenkeleklär çıqtı.

Taliban idaräse cirlektäge qorılıq arqasında Xilmend yılğasındağı Käcäki böyäse häm Kämal Xan yılğalarındağı su külämeneñ kimüen häm şuña kürä İranğa su barıp citmäwen alğa sörä. İran isä texnik belgeçlärdän toruçı delegaśiyäneñ böyälärne barıp qararğa häm monı raslarğa tiyeşlegen belderä.

Äfğanstanda Taliban idarägä kilgännän soñ Paqıstan häm İran çik buylarında qayçaq Taliban köçläre belän bäreleşlär bula.