Koronavirustan soñ ülüçelär kübäyde
Bötendön’ya sälamätlek saqlaw oyışması 2022nçe yılğa qadärge kürsätkeçlär urın alğan xisap çığardı
Soñğı yıllarda yoğışlı bulmağan çirlärneñ artuğa taba kitüe häm moña säbäpçe yanawlar turında kisätü yasaldı.
Bötendön’ya sälamätlek saqlaw oyışması 2023nçe yılğı statistikalar xisabın çığardı. Anda 2022nçe yılğa qadärge kürsätkeçlär urın ala. Xisapqa qarağanda, 2000nçe yıldan 2015kä qadärge tendenśiyälär belän çağıştırğanda, soñğı yıllarda sälamätlek mäydanındağı alğarışta torğınlıq kürelä. Belgeçlär klimat üzgärü häm yoğışlı bulmağan xastalıqlarnıñ üsüçe yanawı turında kisätä, bu mäs’älädä bergäläp köräşergä çaqıra.
Koronavirus arqasında 2020nçe-2021nçe yıllarda dön’ya külämendä 336 million 800 meñ keşeneñ ğomere özelde.
2000nçe yıldan birle ana häm bala sälamätlegendä ähämiyätle alğarışlar buldı. Yäş’ änilärneñ ülemnäre öçtän bergä, balalarnıqı isä yartılaş kimede.
VİÇ, tuberkulyez häm bizgäk şikelle yoğışlı awırularnıñ sanı kimede. Bu 2000nçe yılda 67 bulğan urtaça ğomer ozınlığın 2019nçı yılda 73kä citkerügä öleş kertte.
Ğomumän alğanda, sälamätlek saqlawdağı alğa kiteşkä qaramastan, yoğışlı bulmağan awırular arqasında ülemnär här yıl totrıqlı räweştä arta. Ul terkälgän yıllıq ülemnärneñ dürttän öçenä säbäpçe bula.
Bu tendenśiyä däwam itsä, 2050nçe yılğa qadär här yıl 90 million ülemneñ yaqınça 86%ı yoğışlı bulmağan awırular arqasında kilep çığaçağı farazlana. 2019nçı yıldan birle älege tör ülemnär yaqınça 90%qa arttı.
