Bosniya-Gerśegovinada tağın 6 qorbannıñ şäxese açıqlandı

Bosniya suğışında 1992nçe-1995nçe yıllarda ilneñ törle cirleklärendä yuqqa çıqqan tağın 6 keşeneñ şäxese açıqlandı.

Bosniya-Gerśegovina yuğalğan keşelär institutınnan belderülärençä, 1961nçe yılda tuğan Safiya Paraganliya belän anıñ 1985nçe yılda tuğan qızı Amira Paraganliyanıñ 1992nçe yılda Bratunaśta yuqqa çığuı häm söyäkläreneñ 2021nçe yılda Xosevada tabılğan kümäk qaberlektän çığarıluı açıqlandı.

Şäxese açıqlanğan tağın ber qorbannıñ 1940nçı yılğı Mudjo Êsmiç buluı bilgele. Ul 1995nçe yılda Potośarida yuğalğan häm söyäkläre 2015nçe yılda Zvornikta tabılğan. 1979nçı yılğı Raxman Xrniç isä 1992nçe yılda Vlaseniśada yuğala häm söyäkläre 2003nçe yılda tabıla.  Qaldıqları uzğan yıl Vışegradta tabılğan 1928nçe yılğı Amir Omeroviç häm 1954nçe yılğı Xasib Nukanoviçnıñ da şäxese açıqlandı.

Serbiyä parlamentı 1991nçe yılnıñ 21nçe dekabrendä Yugoslaviya êçendä federal’ struktura bularaq Serb Bosniya-Gerśegovinası cömhüriyäte häm ber ük waqıtta Serb Krainasın tanu qararı çığardı. Anıñ nigezendä 1992nçe yılnıñ 9nçı ğıynvarında Bosniya-Gerśegovina serb xalıq cömhüriyäte iğ’lan itelde.

Bosniya-Gerśegovinanıñ 1992nçe yılnıñ 29nçı fevral’-1nçe mart könnärendä uzdırılğan referendumı näticäsendä bäysezlegen iğ’lan itüennän soñ serblarnıñ kontrolendäge Yugoslaviya armiyäse häm serb xärbi berlekläre möselman bosniyälelärgä qarşı êtnik çistartu başladı.   

1995nçe yılnıñ 14nçe dekabrenä qadär däwam itkän suğışta 100 meñnän artıq keşeneñ ğomere özelde, yaqınça 2 million keşe küçenergä mäcbür buldı.