Şengen töbäge kiñäyäçäkme?
Bolgariyä, Rumıniyä häm Xorvatiyäne Şengen çikläre êçenä alırğa uylıylar
Awrupa Berlege komissiyäse Bolgariyä, Rumıniyä häm Xorvatiyäneñ Şengen töbägenä kerüe mäs’äläsenä qaraşın belderde. Komissiyäneñ êçke êşlär öçen cawaplı wäkile İlva Yoxansson matbuğat cıyılışında: “Bolgariyä, Rumıniyä häm Xorvatiyä Şengen töbägenä kerergä äzer,”-dide. Ul älege illärneñ Kovid-19 kizüe waqıtında, Ukrainadağı suğışnıñ moña qadär kürelmägän näticäläre belän oçraşqanda Şengen töbäge problemasız êşläsen öçen ähämiyätle öleş kertülären assızıqlıy.
Öç däwlätneñ Şengenğa kerüe 8nçe dekabr’dä uzaçaq êçke êşlär ministrları cıyılışında tawışqa quyılaçaq.
Awrupa Berlege komissiyäsennän yasalğan belderüdä bolay diyelä: “Bolgariyä häm Rumıniyä 2011nçe yılda Şengen bäyäläw prośessın uñışlı tögälläde. 2021nçe yılnıñ dekabrendä şura Xorvatiyäneñ Şengen töbägenä kerü öçen kiräkle şartlarnı ütäwen rasladı”.
Şengen töbägendä xäzerge waqıtta 26 däwlät bar. Bu Bolgariyä, Xorvatiyä, Kipr grek idaräse, İrlandiyä häm Rumıniyä tışındağı Awrupa Berlege äğ’zaları, monnan tış, Awrupa Berlegendä tormawçı Norvegiyä, İslandiyä, Şveyśariyä häm Lixtenşteyn. Älege däwlätlar arasında vizasız säyäxät itärgä mömkin.
