İtaliyä Al'plarında ülüçelärneñ sanı 10ğa citte

Al’p tawlarınıñ İtaliyä yağında qalğan Marmolada qalqulığında boz qatlamınıñ işelüe näticäsendä ğomere özelüçelärneñ sanı 10ğa citte.

Trento avtonomiyäle provinśiyäse başlığı Maurizio Fugatti êzläw barışında kiçä tağın ber keşeneñ üle gäwdäse tabıluın häm, şulay itep, yäkşämbe könne bulğan hälakättä can birüçelärneñ sanınıñ 10ğa citüen belderde. Ul êzläw êşçänlegeneñ bügen cirdän häm hawadan däwam itäçägen äytte.

İtaliyä matbuğatı hälakät waqıtında yuqqa çıqqan häm älegä tabılmağan 1 keşe barlığı turında yaza.

Veneto regionı citäkçese Luka Dzaya da ğomere özelüçelärneñ yuğalğan ber keşe belän bergä 11 bulaçağın äytep, monıñ härxäldä axırğı san bulaçağın belderde.

Ülgän 10 keşeneñ 6sınıñ şäxesläre açıqlandı: 4se İtaliyä, 2se Çexiyä watandaşı.

İsegezgä töşeräbez, İtaliyäneñ tön’yaq-könçığışında Marmolada qalqulığında 3nçe iyül’dä boz qatlamı işelde. Şunda bulğan ber törkem al’pinist hälakätneñ näq’ urtasında qaldı

İtaliyädä küpmeder waqıt çiktän tış êsselär xakimlek itä. Marmolada qalqulığında 2nçe iyül’dä cılılıq +10 gradus bula. Bu älege tawda moña qadär kürelgän iñ yuğarı temperatura.

Wäqalätlelär İtaliyädäge iñ zur boz qatlamnarı bulğan Marmolada qalqulığında 15-30 yıl êçendä global’ cılınu säbäple hiç boz qalmayaçağı turında kisätä.