Ukraina häm Moldova - Awrupa Berlegenä kandidat

Awrupa Berlege illäreneñ liderları Ukraina häm Moldovağa kandidatlıq statusın birergä buldı. Bu qarar Bel’giyä başqalası Brüssel’dä sammit däwam itkän arada açqılandı.

Awrupa Berlege şurası räise Çarl’z Mişel’ sośial’ mediada ukrainça häm rumınça belderü yasadı. Ul älege qararnı tarixi dip atıy. Çarl’z Mişel’ Ukraina häm Moldova xalqına täbrik süzlären dä citkerde.

Awrupa Berlege komissiyäse başlığı Ursula fon der Leyen dä Ukraina däwlät başlığı Volodimir Zelenskiy häm Moldova ilbaşı Maya Sandunı qotladı. “İlläregez Awrupa ğailäseneñ ber öleşe. Liderlarnıñ bügenge qararları da monı raslıy,”-dide ul.  

Ukraina Awrupa Berlegenä kerü möräcäğaten Rusiyäneñ höcümnäre başlanğannan son 4 kön ütkäç - 28nçe fevral’dä, Moldova häm Gruziyä isä 3nçe martta yasadı.

Awrupa Berlege komissiyäse 17nçe iyün’dä Ukraina häm Moldovağa kandidat statusı birü turında fiker belderde. Gruziyägä kilgändä, anıñ Awrupa perspektivalarına häm kriteriylarğa turı kilüe qaralıp möräcäğate qabat bäyälänäçäk.  

Ukraina däwlät başlığı Zelenskiy kandidat statusın ciñü dip atadı. Ul ileneñ kiläçägen Awrupa Berlegendä kürüen äytep: “Bu Ukraina häm Awrupa Berlege arasındağı mönäsäbätlärdä unikal’ häm tarixi mizgel,”-dide.  

Kandidatlıq statusı - ozaq yıllar däwam itüçe Awrupa Berlegenä kerü prośessındağı berençe adım. Şunnan soñ şartlarnı cirenä citkerü burıçı quyıla. Axırdan quşılu söyläşüläre başlana, tik añarçı küp yıllar uzarğa mömkin.