Tön'yaq Koreyada täwge Kovid-19 oçrağı
Moña qadär älege il üzendä koronavirusnıñ kürelmäwen alğa sörgän ide
2 yıldan artıq böten dön’yanı teträtkän koronavirus kizüeneñ Tön’yaq Koreyada moña qadär kürelmäwe alğa sörelgän ide. Häm menä alege ildä täwge tapqır Kovid-19 oçrağı terkälüe belderelde.
Koreyanıñ räsmi üzäk xäbär agentlığı citkergänçä, başqala Pxen’yandağı awırulardan alınğan analizlarda koronavirus açıqlanğan. Xäbärdä çirne niçä keşe yoqtıruı äytelmi. Oçraqlarnıñ Omikronnıñ BA.2 bularaq bilgele asqı variantı buluı citkerelde.
İldä “ğadättän tış xäl” iğ’lan itelde. Tön’yaq Koreya liderı Kim Çen-In häm başqa däwlät wäqalätleläre kizü turında söyläşü öçen aşığıç utırışqa cıyıldı. Çirgä qarşı iñ yuğarı däräcädä çikläwlär sistemasın kertü qararı çığarıldı.
Kim Çen-In koronavirusnıñ taraluına yul quymas öçen ildäge barlıq töbäk häm rayonnarda uramğa çığunı tıyarğa çaqırdı. Ul kizüne ciñäçäklären assızıqlap, mediśina xezmätkärlären êş urınnarı häm öylärdä dezinfekśiyäläwne tizläşterergä, çirgä qarşı barlıq mömkinleklärne qullanırğa çaqırdı.
