ҚР Премьер-Министрі Қазақстандағы түрік компанияларының басшыларымен кездесті

ҚР Премьер-Министрі Әлихан Смайылов Қазақстанда жұмыс істейтін түрік құрылыс компанияларының басшыларымен кездесті.

Сондай-ақ Қазақстан нарығындағы инвестициялық жобаларға қызығушылық танытқан түрік компанияларының өкілдерімен бас қосты.

Кездесу барысында энергетика, теміржол, жол құрылысы, суды тазарту және қалдықтарды өңдеу салаларындағы жаңа инвестициялық жобаларды жүзеге асыру мүмкіндіктері талқыланды.

Үкімет басшысы түрік компанияларының Қазақстандағы бірқатар ірі инфрақұрылымдық жобаларды жүзеге асыруға қатысуының маңыздылығын атап өтті. Ол Алматы облысындағы Алматы айналма жолының құрылыс жобасы қазіргі таңда түрік компанияларымен сәтті аяқталып жатқанын білдірді.

Премьер-Министр Смайылов үкіметтің бірлескен ынтымақтастық жобаларын жалғастыруға дайын екенін мәлімдеді. Ол сондай-ақ қазіргі инвестициялық қордың экономиканың әртүрлі салаларындағы 850-ге жуық жобаны қамтитынын айтты.

Түрік компаниясының өкілдері де сөз кезегінде Қазақстан аумағында басқа да жобаларды жүзеге асыру үшін ресурстар мен жабдықтардың дайын екенін мәлімдеді.

Бұл тақырып бойынша істер ҚР Индустрия және инфрақұрылымдық даму министрлігімен бірлесе жүргізілетін болады.

Үкімет басшысы Көкшетау қаласындағы жылу электр стансасының құрылысына қызығушылық танытқан түрік инвесторларымен де кездесті. Смайылов Қазақстанның Энергетика министрлігі ЖЭС құрылысына барлық инвесторлар қатыса алатын ашық тендер өткізіп жатқанын айтып, елінің жаңа ынтымақтастыққа дайын екенін мәлімдеді.