Qızıl Aypara Cəmiyyəti Qəzzada hər gün 37 ananın öldüyünü açıqlayıb

İsrailin Qəzza zolağına hücumları nəticəsində hər gün 37 ananın öldüyü bildirilir.

Fələstin Qızıl Aypara Cəmiyyəti 21 Mart Analar Günü münasibəti ilə etdiyi paylaşımda İsrailin 7 oktyabrdan bəri hücumlarını davam etdirdiyi Qəzza zolağında həyatını itirən analara diqqət çəkib.

Ərəb və ingilis dillərində edilən paylaşımda deyilir: “Qəzza zolağında hər gün 37 ana şəhid olur”. 

Bəzi ərəb ölkələrində, o cümlədən Fələstin və Misirdə 21 mart “Analar günü” kimi qeyd olunur.

İsrailin 7 oktyabrdan bəri Qəzza zolağına təşkil etdiyi hücumlarda azı 14 mini uşaq və 9 220-si qadın olmaqla 31 923 fələstinli həlak olub, 74096 nəfər yaralanıb.

Dağıntılar altında hələ də minlərlə ölünün olduğu bildirilir.