Լիբիայում ջրհեղեղի զոհերի թիվը հասել է 5 հազար 300-ի

Լիբիայի պաշտոնական LANA լրատվական գործակալության հաղորդմամբ՝ նշվում է, որ սեպտեմբերի 10-ին տեղի ունեցած ջրհեղեղի հետևանքով զոհերի թիվը միայն Դերնա քաղաքում հասել է 5 հազար 300-ի։

«Դանիել» փոթորիկը, որն ուժգնացել է Կենտրոնական Միջերկրական ծովում և սեպտեմբերի 10-ին հարվածել Լիբիայի արևելքին, ջրհեղեղներ է առաջացրել Բենգազի, Բեյդա, Մարջ, Սուսե և Դերնա քաղաքներում։

Ազգային միասնության կառավարության վարչապետ Աբդուլհամիդ Դիբեյբեն եռօրյա սուգ է հայտարարել ամբողջ երկրում ջրհեղեղի պատճառով, իսկ Լիբիայի նախագահական խորհուրդը քույր երկրներին և միջազգային կառույցներին օգնություն է խնդրել ջրհեղեղից տուժած շրջանների համար։

Կարմիր Խաչը հայտարարել է, որ Լիբիայում ջրհեղեղի աղետի հետևանքով անհետ կորածների թիվը հասել է 10 հազարի։

Նշվում է, որ Լիբիայի արեւելյան շրջաններում տեղումների քանակը գտնվում է «վերջին 40 տարվա ամենաբարձր մակարդակի վրա»։