تورکیه نینگ مطبوعات خلاصه لری
تورکیه نینگ مطبوعات خلاصه لری
صباح گزیته‌سی: اروپا بیرلیگی اوچره شوونی دوام ایتتیریشگه تیار سرلوحه سی بیلن خبر بیرماقده.
دولت باشلیغی رجب طیب ایردوغا‌ن بیلن اروپا اتفاقی کمیسیونی رئیسی اورسوله وان دیر لیین اورته‌سیده بولیب اوتگن ویدیو کنفرانس اوچره شووی نینگ عکسلری دوام ایتماقده. اروپا اتفاقی نینگ تشقی علاقه‌لر و خوفسیزلیک سیاستی عالي وکیلی جوزیپ باریل، تورکيه بیلن اوچره شوو اوچون فعالیتنی دوام ایتتیریشگه تیار ایکنلیکلرینی معلوم قیلدی. تشقی ایشلر وزیری مولود چه‌ووشوغلو هم «صمیمي و نتیجه آلیشگه اعتبار قره‌تیلگن اوچره شوو اوچون بریوسسیلگه تشریف اویوشتیریشنی صبرسیزلیک بیلن کوتیه‌پمن». - دیگن افاده‌لرگه ا‌ورین بیردی. چا‌ووش اوغلی نینگ 21 - جنوریده بروکسیلگه باریشی کوتیلماقده.
خبر تورک گزیته‌سی: تورکيه قیرغیزستانده‌گی سیلاولر نینگ تینچ و تاتوو محیطده اوتگنیدن خرسند سرلوحه سی بیلن خبر بیردی.
تشقی ایشلر وزیرلیگی قیرغیزستانده اویوشتیریلگن مدتیدن آلدینگی دولت رئیسلیک سیلاوی بیلن مملکتنی باشقروو شکلینی انیقلب آلیش اوچون اویوشتیریلگن رفراندوم نینگ تینچ و تاتوو محیطده تماملنگنیدن خرسندلیگینی بیلدیردی. بو حقده، «تورکيه، قیرغیزستانده‌گی دموکراسی جریانی نینگ تن آلووچی و اجتماعي کیلیشوو اساسیده نتیجه‌لنیشی اوچون تشلنه‌دیگن قدملرنی قوللب - قوّتله‌یدی». - دییلدی. قیرغیزستانده‌گی دولت رئیسلیک سیلاویده، ناانیق نتیجه‌لرگه کوره آوازلر نینگ 79.18 فایزینی آلگن سابق باش وزیر صدر جباراوف نینگ یوتوققه ایریشگنی معلوم قیلینگندی.
ستار گزیته‌سی: تورکيه بیلن اوکراین اورته‌سیده مدافعه پروژه‌سی.
اوکراین نینگ تورکيه‌ده‌گی ایلچیسی اندریی سیبیحه، تورکيه و اوکراین اورته‌سیده مدافعه ترماغیده 30 دن آرتیق پروژه یولگه قوییلگنینی معلوم قیلدی. «بیراقکدار تب2» مودلده‌گی اوچووچیسیز هوا واسطه‌سی تیزیملری خرید قیلیب آلگن بیرینچی چیت دولتلردن بیری ایکنلیکلرینی تأکیدله‌گن ایلچی، «هر ایکّی تامان هم اوکراین ماشینلری نینگ تورکيه‌ده ایشلب چیقریلیشی بیلن بیر قطارده تورک اوچووچیسیز هوا واسطه‌لری نینگ اوکراینده ایشلب چیقریلیشی مسأله‌سیده اوچره‌شوولر آلیب بارماقده» دیدی.
یینی شفق گزیته‌سی: صنایع صادراتی، اوتگن ییلنی ریکارد بیلن تمامله‌دی.
تورک صنایع ترماغی ینگی تور کرونا‌ویروس «کوید – 19» پاندیميسی نینگ سلبي تأثیریگه قره‌مه‌ی اوتگن ییلنی 13 میلیارد 308 میلیون 486 مینگ دالرلیک صادرات بیلن 2020 - ییل نینگ اینگ یوقاری تشقی سوداسیگه ایریشدی. تورکيه نینگ صنایع صادراتی 2020 - ییلی، 2019 - ییل نینگ نوامبر آییگه نسبتاً 9، دسامبر آییگه کوره ایسه 15.8 فایزلیک اوسیش قید ایتدی. دسامبر آییده اینگ کوپ صادرات آرتیشی مدافعه و هواچیلیک ترماغیده کوزه‌تیلدی.
حریت گزیته‌سی: میلیاردلیک ایکسپو هاللیوودگه رقیب.
انتالياده 1.8 میلیارد لیره‌گه قوریلگن ایکسپو میدانی ییریک فلم پلاتاسیگه ایلنیب هاللیوودگه رقیب بولماقچی. تنیقلی دایرکتر گه‌ی ریچی و مشهور اکتور جییسان ستیتهیمنی اوچره‌شتیرووچی جنگاور فلمی «بیش کوز» (فایف ایه ) انتالياده صوره‌تگه آلینه‌دی. فلمنی صوره‌تگه آلیش جریانی اوچون اکتور و اکتریس‌لر یقینده انتا‌ليا‌گه کیلیشه‌دی. جریان 8 - فبروریدن اعتباراً باشله‌یدی.
