بیرلشگن ملتلر تشکیلاتی هیئاتی طالبان ییتکچیلری بیلن اوچره شوو اوتکزدی
اوچره شوونینگ موضوعی افغانستانده خاتین – قیزلرگه کیریتیلگن چیکلاولر و انسانی یاردملرده گی توسیقلردن عبارت
بیرلشگن ملتلر تشکیلاتی انسانی ایشلردن مسؤل باش کاتب اورینباسری مارتین گریفتیس باشچیلیگیده گی بیرلشگن ملتلر تشکیلاتی هیئاتی افغانستان نینگ پایتختی کابلده طالبان ییتکچیلری بیلن اوچره شیب افغانستانده خاتین – قیزلرگه کیریتیلگن چیکلاولر و انسانی یاردملرده گی توسیقلر حقیده گپیردی.
کابل گه سفر اویوشتیرگن بیرلشگن ملتلر تشکیلاتی هیئاتی طالبان اوتیش دور حکومتی نینگ تشقی ایشلر وزیری وکیلی امیرخان متقی و باش وزیر اورینباسری وکیلی عبدالسلام حنفی بیلن اوچره شدی.
طالبان حکومتی سوزچیلریدن بلال کریمی طالبان اوتیش دوری تشقی ایشلر وزیرلیگی سوزچیسی اورینباسری حافظ ضیا احمد خوددی شو اوچره شوولرنینگ موضوعی حقیده تویتر آدرسی ارقه لی بیانات بیردی.
شونده ی بولیب بیرلشگن ملتلر تشکیلاتی ییتکچیسی گریفتیس افغانستانده اوتگن آی قیزلرنینگ تعلیم - تحصیل آلیشلری و خاتین – قیزلرنینگ محلی و خارجی موسسه لرده ایشلشلریگه توسیق بولیش قراری بوییچه خواطلرینی تیلگه آلیب افغانستان خلقی گه قره ته انسانی یاردملرنینگ ثمره لی ییتکیزیب بیریلیشی اوچون خاتین – قیزلرنینگ اکتیف رول آلیشی کیره ک لیگینی تاکییدله گن.
گریفتیس 2023 ییلیده 28 میلیون مهتاج افغانستانلیک که یاردم تامین ایتیلیشی اوچون 4،6 میلیارد دالر یاردم چقیریغی قیلگن لیکلرینی و افغانستان مقیاسیده خوفسیزلیک نینگ آرتیب بارگن لیگینی قید ایتدی.
افغانستانگه قره ته انسانی یاردم نینگ هر شرایطده دوام ایتیب باریشی کیره ک لیگینی تاکییدله گن طالبان باشقرووی نینگ باش وزیر اورینباسری وکیلی عبدالسلام حنفی خاتین – قیزلرگه قره ته کیریتیلگن چیکلاولر بیلن تیگیشلی اوله راق؛
"امید قیله میزکی بو توغریده گی معما کیلیشوو بیلن حل بوله دی" دیب ایتدی.
طالبان اوتیش دور حکومتی نینگ تشقی ایشلر وزیری وکیلی امیرخان متقی ایسه افغانستان نینگ خلق ارا همجمعیت نینگ بیر پارچه سی ایکن لیگینی و بیرلشگن ملتلر تشکیلاتی نینگ افغانستان بیلن دنیانی بیر بیری بیلن یقینلشتیریشده صمیمی رول آلیشی توغریسیده اوستیگه کتته مسؤلیت توشگن لیگینی اورغوله دی.
متقی عیندمده بیرلشگن ملتلر تشکیلاتی هیئاتی نینگ طالبان باشقرووی تامانیدن اعلان قیلینگن عمومی عفو کبی افغانستان نینگ سونگگی «یوتوقلر و فرصتلرینی» تنقیدلر و کمچیلیکلر بیلن بیرگه لیکده «توزیک بیر یانداشوو بیلن» خلق ارا همجمعیت گه ییتکیزیشینی طلب ایتدی.
