افغانستانده قیزلر اوچون عالی بیلیم یورتلری یاپیب قوییلدی

طالبان اوتیش دوری حکومتی نینگ عالی تعلیم وزیرلیگی سوزچیسی حافظ ضیا هاشمی بیرگن بیاناتگه کوره، اولکه ده گی برچه دولت و نادولت عالی بیلیم یورتلریگه قیزلرنینگ تعلیمی بوییچه بویروق یازووی جونتیلگن.

اوشبو بویروقده، وزیرلر کینگشی قراری بیلن قیز اوقیووچیلرنینگ عالی بیلیم یورتلریده تعلیم آلیشلری نینگ ایککینچی بیر بویروق گچه توخته تیب قوییلگن لیگی بیلدیریلگن.

امریکا قوشمه ایالتلری تشقی ایشلر وزیرلیگی سوزچیسی نید پرایس، طالبان عالی بیلیم یورتلریده قیز اوقیچوولرنینگ تعلیم آلیشینی توخته تیب قوییشی نینگ قبول ایتیلیشی نینگ ممکن ایمس ایکن لیگینی و امریکا قوشمه ایالتلری نینگ بونگه چیکلاولر بیلن جواب بیره جگینی ایتدی.

پرایس، طالبان نینگ قراری نینگ افغانستان نفوسی نینگ یرمی نینگ تعلیم آلیشدن محروم قویه جگینی تاکییدله دی.

افغانستانده خاتین – قیزلرنینگ هر ییل اقتصادگه 1 میلیارد دالردن آرتیق حصه قوشگن لیگینی قید ایتگن پرایس، طالبان نینگ بونگه توسیق بولیش گه اورونگن لیگینی افاده ایتدی.

اوتگن ییل 15 آگستده افغانستان باشقرووینی قولگه کیریتیب آلگن طالبان، ایلک مکتب و عالی بیلیم یورتلریده قیز اوقیووچیلرنینگ تعلیم آلیشی گه رخصت بیرگندی.

طالبان، عالی بیلیم یورتلریده قیزلر بیلن ایرککلرنینگ تعلیم آلیش کونلرلریگه اوزگریش کیلتیرگندی. شونده ی بولیب ایرکک اوقیووچیلر ایریم کونلرده قیز اوقیووچیلر ایریم کونلرده تعلیم آلماقده ایدی.

قیز اوقیووچیلرنینگ اورته و لیسه سویه سیده تعلیم آلیشلری توخته تیب قوییلگندی.

طالبان ییتکچیلری قیز مکتبلری نینگ "اسلامی چوکاتده" قیته دن تیکلب یقین پیتده آچیلیشینی اعلان قیلگن حالده مکتبلر آچیلمه گندی.