افغانستان نینگ ایککی شهریده یوز بیرزگن انفجارلرده کوپلب کیشی حیاتینی یوقاتدی

افغانستان نینگ غربیده جایلشگن فراه ولایتی نینگ انار دره تومنیده یول کناریده اورنه تیلگن ماین نینگ پارتلب کیتیشی عاقبتیده 8 کیشی حیاتینی یوقاتدی.

فراه امنیه قومندانلیگی سوزچیسی محب الله محب، انار دره تومنیده یول کناریده اورنه تیلگن ماین نینگ پارتلب کیتیشی عاقبتیده 6 کیشی تینچ اهالی بیلن 2 کیشی خوفسیزلیک کوچلری اعضاسی نینگ حیاتینی یوقاتگن لیگینی بیان ایتدی.

محب اوشبو ماین نینگ طالبان گروهی تامانیدن جایلشتیریلگن لیگینی ادعا ایتدی.

طالبان گروهی تامانیدن موضوع بیلن تیگیشلی حلی گچه بیانات بیریلمه گن.

باشقه تاماندن مملکت نینگ شمال – شرق تامانیده جایلشگن بدخشان ولایتیده فوتبال استدیومیده اویوشتیریلگن هجومده 2 کیشی جان بیردی.

بدخشان امنیه قومندانلیگی سوزچیسی ثناالله روحانی، بدخشان نینگ مرکزی فیض آباد شهریده گی فوتبال استدیومیده اورنه تیلگن ماین نینگ خوفسیزلیک کوچلری قومندانی جنرال نظیر احمد نیازی استدیومدن چیقه یاتگن پیتده پارتلب کیتگن لیگینی بیلدیردی.

اوشبو حادثه ده جنرال نیازی بیلن بیر کیشی قوریقچیسی نینگ اولگن لیگینی معلوم قیلیب بیر کیشی نینگ یره لنگن لیگینی قید ایتدی.

اوشبو هجوم نینگ مسؤلیتینی حلی گچه هیچ کیم اوز بوینی گه آلمه گن.