«تەخت ئويۇنى» نىڭ تۆمۈر تەختى سېتىلدى

تۈركىيە ئاۋازى رادىيوسى خەۋىرى: كىمئارتۇق سودا سارىيى (Heritage Auctions) «تەخت ئويۇنى» تېلېۋىزىيە تىياتىرىدا ئىشلىتىلگەن 900 دىن ئارتۇق بۇيۇمنىڭ كىمئارتۇق سودىسىغا سۇنۇلغانلىقىنى ئېلان قىلدى.

تەخمىنەن ئالتە مىنۇت داۋاملاشقان باھا تالاشتۇرۇشتا، تېلېۋىزىيە تىياتىرىنىڭ قەھرىمانلىرى سەككىز بۆلۈم بويىچە ئۇنىڭ ئۈچۈن كۈرەش قىلغان «تۆمۈر تەخت» 1 مىليون 500 مىڭ دوللارغا بىر مەستانىگە سېتىلدى.

تېلېۋىزىيە تىياتىرىنىڭ قەھرىمانلىرىدىن جون سىنوۋ (Jon Snow) نىڭ قىلىچى تەخمىنەن 400 مىڭ دوللارغا، لېنا خېدېي (Lena Headey) رول ئالغان جېرسېي لەننىستېر (Cersei Lannister) ئەڭ ئاخىرقى قىسىمدا كىيگەن كىيىم 137 مىڭ 500 دوللارغا سېتىلدى.

«تەخت ئويۇنى» كىمئارتۇق سودىسىغا، 4 مىڭ 500 دىن ئارتۇق خېرىدار قاتناشقان بولۇپ، بۇ قېتىمقى كىمئارتۇق سودىسىدىن 21 مىليون دوللار كىرىم قىلىنغان.