تۈركىيە قايتا ھاسىل بولىدىغان ئېنېرگىيە قۇرۇلما كۈچى جەھەتتە ياۋروپادا ئالدىنقى بەشنىڭ ئىچىدە

تۈركىيە جۇمھۇرىيىتى ئېنېرگىيە ۋە تەبىئىي بايلىقلار مىنىستىرى بايراقتار بىلەن سانائەت ۋە تېخنىكا مىنىستىرى مەھمەت فاتىھ قاچىر، بىر شىركەتنىڭ ئىزمىردىكى ئالىئاغادا قۇرغان بىرلەشمە قۇياش تاختىسى ۋە كۆزەنەك ئىشلەپچىقىرىش زاۋۇتىنىڭ ئېچىلىش مۇراسىمىغا قاتناشتى.

مىنىستىر بايراقتار مۇراسىمدىكى سۆزىدە، يېڭى ئىستراتېگىيەلەرنى تۈزۈپ، تۈركىيەنىڭ ئېنېرگىيە ئۆزگىرىشىنى ئەمەلگە ئاشۇرۇشقا تىرىشىۋاتقانلىقلىرىنى بىلدۈرۈپ: «قايتا ھاسىل بولىدىغان ئېنېرگىيە قۇرۇلما كۈچىدە ياۋروپادا ئالدىنقى 5 نىڭ ئىچىدە، دۇنيادا بولسا 11-ئورۇندا تۇرۇۋاتىمىز. ئىنشائاللاھ بۇ يىل ياۋروپادا ئالدىنقى 3 كە، دۇنيادا بولسا ئالدىنقى 9 دۆلەت ئارىسىغا كىرىمىز» دېدى.

بايراقتار يەنە تۈنۈگۈن رەسمىي ئېچىلىش مۇراسىمى ئۆتكۈزۈلگەن زاۋۇتتا، چەت ئەلدىن ئىمپورت قىلىنىدىغان قۇياش تاختىسى كۆزەنىكىنىڭ بۇنىڭدىن كېيىن تۈركىيەدە ئىشلەپچىقىرىلىدىغانلىقىنى، بۇنىڭ بۇ مەھسۇلاتتا چەت ئەلگە بېقىنىشنى ئازايتىدىغانلىقىنى قەيت قىلدى.