تۆرکیأنینگ کۆرت سیاساتی

گۆن باتاردا و تۆرکیه ده کأبیر قاتلاقلار تاراپیندان ایزی گیدرلی یاغدیدا پ. ک. ک یا دا پ. ک. ک بیلن آراسینی آچمایان HDP اۆچین "کۆرت حرکتی"، "کۆرت سیاساتی" یالی سؤزلر اولانیلیار. شیله سؤزلر بیلن ترور قورامالاریندان بیری یا دا اۇنونگ بیلن آراباغلانشیقلی بۇلان سیاسی پارتیا بیر میللتینگ "حرکتی"، "سیاساتی" یالی گؤرکِزیلیأر.

پ. ک. ک دۆرلی یورتلاردا، تۆرکیه، سوریه، ایران و عیراق دا باشغا آدلار بیلن کؤپچۆلیکله یین و ایزی گیدرلی یاغدایدا کؤپ سانلی گۆن باتار یورتلاریندا بۇلسا شخصی گؤرنۆشده و واغتال- واغتال ترور حرکتلرینی قوران ترور قوراماسیدیر. پ. ک. ک نینگ شۇل یورتلاردا قوران هۆجۆملرینده رایات- عسگر، عایال- ارکک، یاش- قارری اۇنلارچا مۆنگ آدام اؤلدۆریلدی، میلیونلارچا آدام یاشایان یرلرینی ترک اتمه لی بۇلدی، بۇلماغا دا دۇوام ادیأر. یاقین گۆن دۇغاری دیزاین اتمه ک ایسله یأن گۆیچلرینگ اۇیناتغیسی بۇلان پ. ک. ک نینگ اؤزۆنی کۆرتلرینگ وکیلی حؤکمۆنده گؤرکِزمه تاغاللاسینا اۇنونگ سیاساتی تایدان دۆشۆنمه‌ک مۆمکین. تۆرکیأنی، سوریأنی، عیراغی و ایرانی بؤلۆپ، عاصیرلارینگ دۇوامیندا تۆرکلر و عاراپلار بیلن بیله لیکده اسلاما اؤنگ باشچیلیق ادن کۆرتلری قوردورجاق ترور دؤولتی بیلن ایسرائیلینگ حۇوپسوزلیغینا حیذمات اتدیرمه ک ایسله یأن امپریالیست گۆیچلرینگ هم ده اۇلارا ایلتِشدیریلن عالیملارینگ، یازیجیلارینگ چمه له شمه لرینه ده دۆشۆنمه‌ک مۆمکین.

آنکارا ییلدیریم بیازیت بیلیم یوردونینگ سیاسی عیلیملار فاکولته‌تی نینگ باشلیغی پروفسور قدرت بلبل ینگ یازغیسینی اۇقایارسینگیز:

اِمما شۇل یالنگیش اوغروقدیرمانینگ نه دۇغروچیل، نه عیلمی نه ده جمغیتچیلیک نتیجه سی بۇلوپ بیلمه‌ز. أهلی آلمانلاری، عاراپلاری، تۆرکلری بیر حرکت/ سیاسات حؤکمۆنده قابول اتمه ک نأحیللی عیلمی و حاقیقاتا لاییق چمه لِشمه بۇلسا، أهلی کۆرتلری هم شیله قابول اتمه ک یرلیکلی بۇلماسا گره ک. میلیونلارچا آدامدان عمله گلیأن تاپاووتلی قاتلاقلاری بۇلان حالقی بیر بیتِوی گؤرمه ک توتالیتر قاراییشینگ بیانیدیر. "کۆرت سیاساتی" سؤزۆندن حرکت ادِنیمیزده، کۆرتلر دینگه تۆرکیه‌دأکیلردن عیبارات دأل. تۆرکیه بیلن بیله لیکده ایران، عیراق، سوریه و گۆن باتار یورتلارینداقی حالقی گؤز اؤنگۆنده توتیاریس. هاوا، دؤولتلر حاقدا آیدیپ بۇلار. اِمما بیر جمغیت حؤکمۆنده ایتالیان، فرانسوز، تۆرک سیاساتی بارادا آیدیپ بۇلار می؟ تۆرکلرینگ سیاساتی؟ گؤز اؤنگۆنده توتولیان تۆرکیه دأکی کۆرتلرینگ سیاساتی بۇلسا، هر بیر آسودا و دموکراتیک جمغیتده بۇلشی یالی، کۆرتلر هم بیر بؤله‌ک دأل، دۆرلی- دۆرلی. ایلکی بیلن أهلی کۆرتلر هر بیر جمغیتده بۇلشی یالی، سیاسات بیلن قیزیقلانمان بیلر. سیاسات بیلن قیزیقلانمایانلارینگ أهلی سس بریأن دألدیر. سس بریأنلرینگ أهلی ح. د. پ حزبینه سس بریأن دألدیر.  آق پارتیا هم کۆرتلردن آزیندان ح.د . پ یالی سس آلیار. حۆداپار حزبی نینگ سس موقداری آز هم بۇلسا، کأبیر ییغناقدا میلیونلارچا آدامی ییغنایاندیغینی گؤریأریس. ح. د. پ پارتیاسینا سس بریأنلرینگ أهلیسی هم پ. ک. ک نینگ ترور حرکتلرینی تاصصیقلامایان بۇلسا گره ک. اۆیشۆریپ آیدانیمیزدا باشغا جمغیتلر اۆچین بیان ادیلمه یأن قاراییشینگ بیر طایپا یا دا تیره یالی، کۆرتلر اۆچین هم بیان ادیلمه گی نینگ هایسی بیر دۆشنۆکلی تاراپی یۇق. بو بیان کۆرتلری کِمسیدیجی و ایدئولوژیک چمه لِشمه دیر.

من شخصی تایدان تۆرکیه ده کؤپ سانلی ساغدین پیکیرلی رایات یالی پ. ک. ک بیلن ح. د. پ نینگ یاغلانشدیریلمازلیغی نینگ، ح. د. پ نینگ آلیپ بارجاق سیاساتینا یۇل بریلمه گی نینگ تاراپداری. اِمما آداملارینگ ادیأن پیکری نینگ أهمیتی قالمایار. سیاسات دموکراسی نینگ، آزاتلیغینگ، آسودا یاشاییشینگ دأل، ترور قوراماسی نینگ و اۇنونگ توتالیتر باسیشلاری نینگ سریشده سینه اؤورۆلن حالاتیندا جمغیتچیلیک و دموکراتیک تاراپ قالمایار.

ایسه م شرطلر بیله چیلشیریملی بۇلماندیغینا قارامازدان تۆرکیه دأکی بِللی قاتلاقلارینگ پ. ک. ک-نی و ح. د. پ-نی "کۆرت سیاساتی" حؤکمۆنده گؤرکِزمه‌ک اوغرونداقی اِگیلشیکسیز تاغاللالارینگ سبأبی نأمه‌کأ؟ نأمه اۆچین پ. ک. ک نینگ و امپریالیسمینگ دیلینه بۇیون اِگیأرلر؟ شۇل یالنگیش اوغروقدیرما تاغاللاسی دینگه بیر تۆرکیه ده دأل، بؤلگه یورتلاریندا دا بۇلوپ بیلر.

ایلکی بادا یادا دۆشیأن بیرنأچه سبأبینگ اۆستۆنده دوروپ گِچه لینگ.

پ. ک. ک قۇرقوسی: دورموشدا دموکراتیک، ارکین و پلورالیست شرطلرده یاشایان بیزینگ یالی آداملار کؤپلِنچ ترور قورامالاری نینگ باسیشلارینی، عمله گتیرن قۇرقونچ قۇرقولارینی یاتدان چیقارمایار. چۆنکی ترور قورامالاری دینگه ترور بیلن گۆن ترتیبینده اۇرون آلیارلار و بیرنأچه واغتدان سۇنگ گۆن ترتیبیندن چیقیارلار. ایسه م ترور قورماالاری نینگ قۇرقی دؤره‌تمِه‌ک، باسیش اتمه‌ک، بِللی آداملاری گؤنۆدن نیشانا آلیپ، قۇرقوزماق یالی اصولیه‌تی بار. شیله لیکده کۆرتلرینگ أهلیسینی "کۆرت سیاساتی" بیلن توتالیترلشدیرمه ک تاغاللاسی نینگ بیر بؤله گی پ. ک. ک نینگ عمله گتیریأن قۇرقوسی بیلن دۆشۆنشدیریلیپ بیلینر. پ. ک. ک نینگ اؤزۆنه قارشی چیقان و باشغاچا پیکره ایه بۇلان کۆرت آیدینلارینی، آسودا ایلاتی یۇق ادیأندیگی بیلینیأر.

یۇلداش باسیشی: "کۆرت سیاساتی" سؤزۆنی اولانیانلارینگ اساسی بؤله‌گی تۆرک چِپینه (سۇلچی تۇپارینا) دِگیشلی. تۆرک سۇلچوسی نینگ بِللی وکیللری نینگ اساسی بؤله گی نینگ بۇلسا انقلاپ گچمیشینه ایه دیگی بیلینیأر. "کۆرت سیاساتی" سؤزۆنی اِگیلشیکسیز اولانیان تۆرک چِپی نینگ ایچیندأکی قاتلاقلارینگ بو تاغاللاسی مارکسیست- لنینچی ایدئولوژیدن گلیأن پ. ک. ک بیلن "انقلاپچی آرقالاشیق" حؤکمۆنده گؤرۆلیپ بیلر. شۇل قاتلاقلارینگ توتالیتر قاراببشا ییقغین اتمه‌کلری نینگ بیله کی بیر سبأبی بۇلسا ایه بۇلان انقلاب گچمیشیندن حالاص بۇلماندیقلاری، دموکراسی، آزاتلیق، کؤپچۆلیک (پلورالیسم) یالی آدالغالاری یتیرلیک درجه ده اؤزلِشدیرمأندیکلری بیلن دۆشۆندیریپ بیلینر.

تۆرکیأ قارشی دوریان حالقارا تاراپلارا انتگره بۇلماق: "کۆرت سیاساتی" سؤزینی اِگیلشیکسیز اولانیانلارینگ بیر بؤله گی بۇلسا تۆرکیأ قارشی دوریان حالقارا تؤوِه‌رِکلر بیلن بیله لیکده حرکت ادیأندیکلرینی گؤریأریس. دِگیشلی تؤوه‌رِکلر تاراپیندان قۇلدانیان شۇل قاتلاقلار قۇلدایان قاتلاقلار بیلن اوتغاشیقلی چمه لِشمأ ایه.

حؤکۆمته قارشی دورماق: حؤکۆمته قارشی دورماغینگ کأبیر آیدینگ پیکیرلیلرینگ اؤزۆنی آلیپ بارشینا دۆشۆنمه‌ک تایدان آیدینگلاشدیریجیدیغینی آیتماق بۇلار. حؤکۆمته و اردوغاتا قارشی دورماق اۆچین کأبیر انتلکتوئللر هروئین سؤوداسینی ادیأن، بی گۆنأ چاغالاری قیریان ترور قوراماسینی قۇلداماغی هم سایلان آلیارلار.

آیدینگ پیکیرلی دییلنلرینگ اؤز یوردونا یاد بۇلماغی: جمغیته قارشیداش هم دییپ بۇلار. آیدینگلارینگ اؤز یوردونا یاد بۇلماغی گۆن باتارلی بۇلمادیق جمغیتلرینگ یۆز ییللیق گۆن باتارلاشما تاریحی نینگ قیصصاسیدیر. شۇل غوصصالی قیصصانی شاهیر سزائی قاراقۇچ ارته‌کی آدلی قۇشغوسیندا اؤرأن یرلیکلی بیان ادیأر. عثمانلی دؤورۆنده عیلمینی، تکنولوژیسینی آلیپ یوردونا قۇشانت قۇشسون دییپ، گۆن باتارا بیلیم آلماغا اوغرادیلانلارینگ اساسی بؤله گی اؤز جمغیتلریندن اوزاقلاشیپ، گۆن باتارا عاشیق آداملار حؤکمۆنده یورتلارینا دۇلانیپ گلیپدی. جمهوریت دؤورۆنده باشدان گچیریلن بۇلسا اؤز مدنیتیندن، تاریحیندان دۇلی اۆزنه‌لشیپ، مدنی تایدان گۆن باتارا بۇیون اِگمه‌کلیک.

اۆیشۆریپ آیدانیمیزدا چپچی ترور قوراماسی بۇلان و اساسا ندا تۆرکلردن عمله گلیأن DHKPJ و مارژینال سۇلچی پارتیا اۆچین "تۆرک سیاساتی" دیمه ک هم شۇنچا یرلیکلیدیر. پ. ک. ک قۇرقوسی، یۇلداش باسیشی و سبأبی نأمه بۇلسا بۇلسون، پ. ک. ک نی یا دا ح. د. پ نی "کۆرت سیاساتی" حؤکمۆنده قابول اتمه ک آزاتلیغینگ تاراپیندا دوریان، بویسانچلی و پاراحاتچیلیغی سؤییأن کۆرتلری کِمسیتمه‌کدیر. اؤزۆنی آیدینگ پیکیرلی حاساپ ادیأنلره ترورینگ و امپریالیسمینگ پیکیرلرینه بۇیون اِگمه‌ک دأل، اۇنگا قارشی دورماق و حاقیقاتی بیان اتمه‌ک گِلیشر.

آنکارا ییلدیریم بیازیت بیلیم یوردونینگ سیاسی عیلیملار فاکولته‌تی نینگ باشلیغی پروفسور قدرت بلبل ینگ یازغیسینی اۇقادینگیز.