تورک دؤولتلری تشکیلاتی؛ چوخ‌طرفلی سیاسی مصلحتلشمه‌لر توپلانتیسی
تورکیه خاریجی ایشلر ناظیرینین معاوینی نوح ییلماز، تورک دؤولتلری تشکیلاتینین خاریجی ایشلر ناظیرلری معاوینلرینین چوخ‌طرفلی سیاسی مصلحتلشمه‌لر ایکینجی توپلانتیسیندا ایشتیراک ائدیب
تورکیه خاریجی ایشلر ناظیرینین معاوینی نوح ییلماز، تورک دؤولتلری تشکیلاتینین خاریجی ایشلر ناظیرلری معاوینلرینین چوخ‌طرفلی سیاسی مصلحتلشمه‌لر ایکینجی توپلانتیسیندا ایشتیراک ائدیب.
خاریجی ایشلر ناظیرلی‌گینین X سوسیال مئدیا حئسابیندا یئر آلان پایلاشیملارا گؤره، آنکارادا ناظیر معاوینی ییلمازین ائو صاحیبلیگی ایله تورک دؤولتلری تشکیلاتی خاریجی ایشلر ناظیرلری معاوینلری چوخ‌طرفلی سیاسی مصلحتلشمه‌لرین ایکینجی توپلانتیسی گئچیریلیب.
مصلحتلشمه‌لر چرچیوه‌سینده نوامبرین ۶-دا قیرقیزیستان‌ین باشکندی بیشکئک‌ده گئچیریله‌جک ۱۱-جی تورک دؤولتلری تشکیلاتی ذیروه‌سینه حاضیرلیق و عوضو اؤلکه‌لر آراسیندا امکداشلیغین داها دا گوجلندیریلمه‌سی اوچون گؤروله‌جک ایشلر موذاکیره ائدیلیب.
بوندان باشقا، ییلماز مصلحتلشمه گؤروشو چرچیوه‌سینده قازاقیستان خاریجی ایشلر ناظیرینین معاوینی علی‌بئک باکائو ایله گؤروشوب. ایکی‌طرفلی گؤروش زامانی تورک دؤولتلری تشکیلاتینین چوخ‌طرفلی پلاتفورملاردا امکداشلیغی و ایکی‌طرفلی علاقه‌لر موذاکیره ائدیلیب.
ییلماز گؤروش چرچیوه‌سینده، قیرقیزیستان خاریجی ایشلر ناظیرینین معاوینی آی‌بئک مولدوقازییئو ایله ده گؤروشوب. ایکی‌طرفلی موناسیبتلرین و چوخ‌طرفلی پلاتفورملاردا امکداشلیغین موذاکیره اولوندوغو گؤروشده، ییلماز تورک دؤولتلری تشکیلاتی دؤور باشقانلیغینی تحویل آلماغا حاضیرلاشان قیرقیزیستانا اوغورلار آرزولاییب.
