"سالار تورکلری" و "سالار تورکجه‌سی"
بو یازیدا چین طرفیندن رسمی اولاراق تورک و سنی موسلمان اولاراق قبول ائدیلن، بعضی قایناقلاردا چین‌ده اوغوزلار و یا چین تورکمنلری کیمی ده تانینان سالار تورکلری، سالار تورکلرینین یاشادیقلاری یئر و سالار تورکجه‌سیندن بحث ائدجه‌ییک
چین خالق جمهوریتی سرحدلری داخیلینده ۵۶ آزینلیق دیلی وار. رسمی بیلگیلره گؤره، اونلاردان یئددیسی تورک، غیررسمی بیلگیلره گؤره ایسه دوققوزو تورکدور. بونلار اویغور، قازاخ، قیرغیز، اؤزبک، تاتار، سالار، ساری اویغور، تووان و فو-یو قیرغیزلاردیر. بعضی بیلیم آداملارینا گؤره، تووا و فو-یو قیرغیزلاری چین‌ده آزینلیقلارین دیللرینین تصنیفاتی و عینیلشدیریلمه‌سی زامانی نظره آلینمامیش اولابیلر، چونکو اونلار کولتورل جهتدن بیرلیکده یاشادیقلاری موغوللارا چوخ اوخشاردیرلار. بو سببدن رسمی سندلرده تورکجه دانیشان اینسانلار آراسیندا یئر آلماییبلار.
بو یازیدا چین طرفیندن رسمی اولاراق تورک و سنی موسلمان اولاراق قبول ائدیلن، بعضی قایناقلاردا چین‌ده اوغوزلار و یا چین تورکمنلری کیمی ده تانینان سالار تورکلری، سالار تورکلرینین یاشادیقلاری یئر و سالار تورکجه‌سیندن بحث ائدجه‌ییک.
چینین ان آز اهالیسی اولان تورک توپلومو کیمی تانینان سالار تورکلری بو گون اساساً چینین چینخای و قانسو ایالتلرینده یاشاییرلار. اهالیسینین ۱۱۰.۰۰۰ اولدوغو تخمین ائدیلن سالار تورکلری چین‌ده "سالارلار" و یا "سالار یئرلیلری" معناسینی وئرن "یوگوزو" کیمی تانینیر. بوندان علاوه، سالار تورکلری تاریخی قایناقلاردا سالار، سالیر، سالقور و سالور کیمی قید اولونور. چوخ آز اهالیسی اولان چین خاندانلارین‌دان ساغ قالان سالار تورکلرینین چین مدنیت اینقیلابیندان سونرا کمونیست رئژیم آلتیندا داغیلمادان و آسئمیله اولونمادان گونوموزه قدر گلیب چاتمالارینین ان اؤنملی سببی کولتور و اینانجلارینا اولان باغلیلیقلاریدیر.
آراشدیرماجیلار چین‌ده‌کی سالار تورکلرینین تاریخینی ۱۳-جو عصره عائید ائدیرلر. مغول ایستیلاسینا گؤره سمرقند و اطرافلاریندان بؤلگه‌یه گلدیکلری گومان ائدیلن سالار تورکلرینین، اوغوز تورکلرینین سالور طایفاسینین نسیللری اولدوغو گومان ائدیلیر. اصلینده، اوغوز خاقان داستانینا گؤره سالور تورکلری اوغوزلارین ۲۴ طایفاسیندان بیری، کاشغرلی محمودا گؤره ایسه ۲۲ اوغوز بویونون بئشینجیسیدیر. بوندان علاوه، اوغوز بویلاری تورک دؤولتلرینین، خوصوصا ده سلجوقلولارین و عثمانلیلارین منشأیینی تشکیل ائدن بؤیوک بیرلیکلردیر. سالار و یا سالور طایفاسی دا بو بؤیوک اوغوز نسلینین بیر حیصّه‌سی کیمی تانینیر و اؤنملی دؤیوشچو طایفاسی کیمی تانینیر. بو گون تورکیه‌نین چئشیدلی بؤلگه‌لرینده «سالور» آدلی شهر و کندلرین کؤکو آدی چکیلن اوغوز تورکلرینین سالور طایفاسی ایله باغلیدیر. بوندان علاوه، بو گون یاشایان تورکمن تورکلرینین اوغوز تورکلرینین سالور طایفاسیندان گلدیگی تخمین ائدیلیر.
سالار تورکلری ایسلامی ۱۷۵۰-جی ایلده قبول ائتمیشلر و هله ده اؤز اینانجلارینا و کولتورلرینه صادیقدیرلر. دانیشدیقلاری دیل موعاصیر تورک دیل ساحه‌سینین جغرافی و لینقویستیک پرینسیپلرینه گؤره گونئی-باتی و یا اوغوز قروپوندادیر. بو گون اساساً چینین باتی بؤلگه‌سینده دانیشیلان سالار تورکجه‌سی هله یازی دیلینه چئوریلمه‌میش و یالنیز دانیشیق دیلی اولاراق وارلیغینی داوام ائتدیریر.
یونئسکو-نون ۲۰۱۰-جو ایلده نشر ائتدیردیگی «نسلی کسیلمکده اولان دیللر قیرمیزی کیتابی»ندا «تهلوکه‌لی دیللر» کاتئقوریسینده قید ائدیلن سالار تورکجه‌سی خوصوصیله یاشلی اهالی آراسیندا گئنیش دانیشیلدیغی حالدا، گنج نسیللر آراسیندا ماندارین دیلینین تحصیل دیلی کیمی گئنیش یاییلدیغی معلومدور. بو وضعیت سالار تورکجه‌سینین ایستیفاده‌سینه تأثیر ائتسه ده، سالار تورکلرینین کولتورل کیملیکلرینی قورویوب ساخلاماق چابالارینین بیر حیصّه‌سی اولاراق سالار تورکجه‌سی یاشاماقدادیر.
