تورکیه‌نین فیندیق صادراتی

تورکیه 2024-2025 فیندیق صادراتی مؤوسومونون ایلک آییندا بو محصول‌دان تخمینا 197،6 میلیون دو‌لار گلیر الده ائدیب.

قارا دنیز فیندیق و محصول‌لاری صادراتچیلار بیرلیگی طرفیندن وئریلن یازیلی آچیقلامادا، 1 سپتامبردا باشلایان 2024-2025 صادرات مؤوسومونون ایلک آیی ایله باغلی معلومات وئریلدی.

آچیقلامادا، 1-30 سپتامبر تاریخ‌لری آراسیندا خاریجه 197 میلیون 563 مین 194 دو‌لار قارشیلیغیندا 24 مین 926 تون فیندق ساتیلدیغی بیلدیریلیب.

آچیقلامادا قئید اولونوب کی، اؤتن مؤوسومون عینی دؤورونده 24 مین 462 تون فیندیق صادر ائدیلیب و 152 میلیون 866 مین 779 دو‌لار گلیر الده ائدیلیب.