تورک جمهوریتلری‌نده کئچن هفته
۲۶ نوامبر ۲۰۲۴ تاریخینده تورک دؤولتلری تشکیلاتی و بیرلشمیش میللتلر صنایع اینکیشاف تشکیلاتی آراسیندا اورتاق معلومات ایمضالاندی
مرکزی آسیا تورک جمهوریتلری‌نین آوروپا اؤلکه‌لری ایله علاقه‌لری، هر کئچه‌ن گون داها دا اینکیشاف ائدیر. قازاقیستان جمهورباشقانی قاسیم جومرد توکایئودن سونرا قیرقیزیستان جمهورباشقانی سادیر جاپاروو دا کئچه‌ن هفته آوروپا اؤلکه‌لرینه رسمی سفر گئرچکلشدیردی. ایندی بو و دیگر اهمیتلی اینکیشافلارا نظر سالاق.
۲۴-۲۷ نوامبر ۲۰۲۴ تاریخلرینده قیرقیزیستان جمهور باشقانی سادیر جاپاروو، اتریش و آلمانیایا رسمی بیر سفر گئرچکلشدیردی. جمهورباشقانی جاپاروو، ۲۵ نوامبر تاریخینده اتریش جمهورباشقانی آلکساندر فان در بلن، باش ناظیر کارل نهامر و مجلیس باشقانی والتر روسنکرانز ایله آیری-آیری گؤروشمه‌لر ائتدی. ائدیله‌ن گؤروشمه‌لر نتیجه‌سینده، ایکی اؤلکه آراسیندا ۶ راضیلاشما ایمضالاندی.
اتریش‌دن آلمانیایا کئچه‌ن جمهورباشقانی جاپاروو، پایتاخت برلینده آلمانیا جمهورباشقانی فرانک-والتر اشتانمایر و باش ناظیر اولاف شولتس ایله ایکیلی گؤروشمه‌لر ائتدی. گؤروشمه‌لر نتیجه‌سینده قیرقیزیستان و آلمانیا آراسیندا ۱۷ راضیلاشما ایمضالاندی. جمهورباشقانی جاپاروو، سفر چرچیوه‌سینده آلمانیانین قاباقدا گلن ایش آداملاری ایله گؤروشدو و قیرقیزیستان‌داکی سرمایه فورصتلرینی ایضاح ائتدی.
روسیا دؤولت باشقانی ولادیمیر پوتین، ۲۷-۲۸ نوامبر ۲۰۲۴ تاریخلرینده قازاقیستان‌ا رسمی سفر گئرچکلشدیردی. ولادیمیر پوتین، پایتاخت آستانادا رسمی مراسیمله قارشیلاندی. ائدیله‌ن باش-باشا و هیئتلرآراسی گؤروشمه‌لر نتیجه‌سینده، قازاقیستان و روسیا آراسیندا ۱۹ راضیلاشما ایمضالاندی. قازاقیستان جمهورباشقانی قاسیم جومرد توکایئو و روسیا دؤولت باشقانی ولادیمیر پوتین طرفیندن ایمضالانان اورتاق معلوماتین ۳۶ ماده‌دن میدانا گلمه‌سی، پوتین‌ین قازاقیستان سفرینین محصولدار کئچدیگینین گؤستریجیسیدیر. سفر چرچیوه‌سینده، دؤولت باشقانلارینین آنلاین ایشتیراکی ایله روسیا فدراسیونونا باغلی باشقوردیستان جمهوریتی‌نین پایتاختی اوفا شهرینده، ۲۰.جی قازاقیستان-روسیا بؤلگه‌لرآراسی امکداشلیق فورومو، اومسک شهرینده ایسه الفارابی قازاق میللی اونیوئرسیته‌سینین شعبه‌سینین آچیلیش مراسیمی گئرچکلشدیریلدی. خاطیرلاتماق لازیم اولسا، روسیانین یئددی اونیوئرسیته‌سینین شعبه‌لری قازاقیستان‌دا فعالیت ایجرا ائتمکده‌دیر.
۲۸ نوامبر ۲۰۲۴ تاریخینده قازاقیستانین پایتاختی آستانادا کولکتیو تهلوکه‌سیزلیک راضیلاشماسی تشکیلاتی ذیروه‌سی گئرچکلشدیریلدی. ذیروه‌یه بلاروس، قازاقیستان، قیرقیزیستان، روسیا فدراسیونو و تاجیکیستان دؤولت باشقانلاری قاتیلدی. شانگهای امکداشلیق تشکیلاتی، موستقیل دؤولتلر بیرلیگی و کولکتیو تهلوکه‌سیزلیک راضیلاشما تشکیلاتی عمومی کاتیبلری ذیروه‌ده حاضر اولدو. ذیروه‌نین ان اهمیتلی نتیجه‌سی اولاراق تاجیکیستان-افغانیستان سرحدینین گوجلندیریلمه‌سینه ایستیقامتلی پروگرامین ایمضالانماسی گؤستریله‌بیلر.
۲۹ نوامبر ۲۰۲۴ تاریخینده روسیا فدراسیونونا باغلی ساخا جمهوریتی‌نین باشقانی آیسن نیکولایئو، قیرقیزیستان‌ا ایش سفری گئرچکلشدیردی. نیکولایئو، پایتاخت بیشکئک‌ده قیرقیزیستان جمهورباشقانی سادیر جاپاروو ایله گؤروشدو.
***
۲۶ نوامبر ۲۰۲۴ تاریخینده تورک دؤولتلری تشکیلاتی و بیرلشمیش میللتلر صنایع اینکیشاف تشکیلاتی آراسیندا اورتاق معلومات ایمضالاندی. سؤزو گئدن معلومات، تشکیلاتلار آراسیندا امکداشلیغی گوجله‌ندیرمه مقصدی گودور.
۲۹ نوامبر ۲۰۲۴ تاریخینده ماجاریستانین پایتاختی بوداپست‌ده، تورک دؤولتلری تشکیلاتی آغساققاللار شوراسی ۱۶.جی ییغینجاغی گئرچکلشدیریلدی. ییغینجاغا تشکیلاتا عضو و موشاهیده‌چی اؤلکه‌لردن آغساققاللار شوراسی عضولری قاتیلدی. آغساققاللار شوراسی عضولری، ماجاریستان میللی مجلیسینه ده گئتدی.
۲۷ نوامبر ۲۰۲۴ تاریخینده تورکسوی عمومی کاتیبی سلطان رائو، بیرلشمیش میللتلر مدنیتلر اتفاقی ۱۰.جو گلوبال فورومونا قاتیلاراق دانیشدی.
اینکیشافلاردان گؤرولدوگو اوزره، بین الخالق تورک قورولوشلاری، گلوبال اولاراق فعالیتلرینی داوام ائتدیریرلر.
ایلگیلی‌لی خبرلر
تورک جمهوریتلری‌نده کئچن هفته
تورک جمهوریتلری آراسینداکی امکداشلیغی گوجلندیره‌ن فعالیتلر سرعت کسمه‌دن داوام ائدی
