"زیتون یاغلی لوبیا" نئجه پیشیریلیر؟

تورک مطبخینده اتسیز اولا‌راق، زیتون یاغی ایله پیشیریلن و اوتاق ایستیلیگینده یئییلن بوتون یئمک‌لره "زیتون یاغلی یئمک" آدی وئریلیر. یعنی بو آد یئمه‌گین هانسی یاغلا ائدیلدیگینی دئییل، نوعونو بیلدیریر. دئمک اولار کی، هر بیر تروز و چوخو باغلیات زیتون یاغلی یئمک کیمی پیشیرمک اولار. خصوصیله ایستی هاوا‌لاردا ترجیح ائدیلن زیتون یاغلیلار، تورک مطبخینده اساس یئمک‌دن داها چوخ، یان یئمک کیمی ایشلدیلیر.

"زیتون یاغلی لوبیا" پیشیرمک اوچون لازیم اولانلار:

½  کیلو گرام تزه لوبیا

2  باش اورتا کیچیک دوغرانمیش سوغان

4  عدد اورتا بوی رندلنمیش بامادور

½  سو ایستکانی زیتون یاغی

2-3  دیش ساریمساق

½  سو ایستکانی سو

شکر

دوز

زامان گلدی "زیتون یاغلی لوبیا" یئمه‌گینی پیشیرمه‌یه.

لوبیا‌لاری یویون، بیچاق کؤمیی ایله تپه‌لرینی و وارسا کیلچیق‌لارینی گؤتوروب، بویلا ایکی‌یه بؤلون. قازانی‌نین دیبینه بیر میقدار سوغان قویون، اوزرینه لوبیانین بیر آزینی علاوه ائدین. بیتکی‌لرین اوزرینده ده رندلنمیش بامادورلاری یئرلشدیرین. تکرار سوغان و اوزرینده یئنه لوبیا علاوه ائدین. بو شکیلده بیر سیرا سوغان، بیر سیرا لوبیا و بیر سیرا بامادور اولماقلا بوتون ماتریالی قازانا قویون. ان اوسته اینجه دوغرانمیش ساریمساق، شکر و دوز علاوه ائدین. 1/2 ایستکان سویو دا یئمه‌گین اوستونه قویدوقدان سونرا قازانی‌نین قاپاغینی اؤرتون و ضعیف اوددا 20-30 دقیقه پیشیرین. لوبیا‌لار یوموشاندیقدان سونرا اوجاق‌دان گؤتوروب اوتاق ایستیسینده و یا سویوق اولا‌راق سرویس ائدین. دئمک اولار کی، بوتون زیتون یاغلی یئمک‌لر کیمی زیتون یاغلی لوبیا دا پیشندن بیر گون سونرا داها لذت‌لی اولا‌جاق‌لار. عافیت اولسون.