تورک جمهوریتلرینده گئچن هفته

نیویورکدا داوام ائد‌ن ۷۹.جو بیرلشمیش میللتلر عمومی قورولونا قیرقیزیستان، شیمالی قیبریس تورک جمهوریتی و تورکیه جمهورباشقانلاری قاتیلدیلار. لیدئرلر چوخ ساییدا ایکیلی گؤروشمه‌لر ائتدیلر. عمومی قورول چرچیوه‌سینده تورک دؤولتلر تشکیلاتینا عضو اؤلکه‌لرین خاریجی ایشلر ناظیرلری ییغینجاغی ائدیلدی. مرکزی آسیا+آمریکا خاریجی ایشلر ناظیرلری ییغینجاغی گئرچکلشدیریلدی. نیویورک‌دا آستانا پلتفورمو خاریجی ایشلر ناظیرلری ییغینجاغی دا ائدیلدی. ییغینجاغا ایران، روسیا و تورکییه خاریجی ایشلر ناظیرلری قاتیلدی.

۲۴ سپتامبر ۲۰۲۴ تاریخینده تورک خبر آژانسلاری بیرلیگی، بیرلیگین لوگوسونون قبول ائدیلدیگینی آچیقلادی. ۶ نوامیر ۲۰۲۳ تاریخینده قورولان تورک خبر آژانسلاری بیرلیگینه آنادولو، آذرتاج، کابار، کازکونتئنت و اوزآ خبر آژانسلاری عضودور.

۲۵-۲۶ سپتامبر ۲۰۲۴ تاریخلرینده سمرقند شهرینده آسیا آلت یاپی سرمایه بانکی ایداره هیئتی ایللیک ییغینجاغی گئرچکلشدیریلدی. ییغینجاغا ۱۰۰دن چوخ اؤلکه‌دن ۲ میندن چوخ مسئول قاتیلدی. اؤزبکیستان جمهورباشقانی شؤوکت میرضیایئو ییغینجاغین آچیلیشینا قاتیلدی و خاریجی اؤلکه نماینده‌لری ایله آیری آیری ییغینجاقلار ائتدی.

۲۶ سپتامبر ۲۰۲۴ تاریخینده جلال آباد شهرینده تورک دؤولتلر تشکیلاتی توریزم ناظیرلری ۹.جو ییغینجاغی گئرچکلشدیریلدی. ییغینجاقدا جلال آباد شهری ۲۰۲۵.جی ایلده تورک دونیاسینین توریزم پایتاختی اولاراق اعلان ائدیلدی.

۲۷ سپتامبر ۲۰۲۴ تاریخینده تورکمنیستان موستقیللیگینین ۳۳.جو ایلینی مراسیملرله قوتلادی. تورکمنیستاندا ۲۰۱۸.جی ایلده‌ن بو یانا ۲۷ سپتامبر موستقیللیک گونو اولاراق قوتلانیر.

***

۲۳ سپتامبر ۲۰۲۴ تاریخینده آذربایجان جمهور باشقانی ایلهام علییئو اؤزبکیستان جمهوریتی باش ناظیر کؤمکچیسی جمشید خوجایئوی قبول ائتدی. قبولدا آذربایجان-اؤزبکیستان ایکیلی علاقه‌لرینین گوند‌مده‌کی مؤوضوعلاری اله آلیندی.

۲۴-۲۶ سپتامبر ۲۰۲۴ تاریخلرینده باکی شهرینده ۵.جی آذربایجان بین الخالق مدافعه سرگیسی ائدیلدی. سرگییه ۳۸ اؤلکه‌دن ۲۷۰ شیرکت قاتیلدی. آذربایجان و تورکیه جمهوریتلری مدافعه ناظیرلری سرگینین آچیلیش مراسیمینده ایشتیراک ائتدیلر. آذربایجان جمهور باشقانی ایلهام علییئو سرگینی گزدی.

۲۵ سپتامبر ۲۰۲۴ تاریخینده آنکارا شهرینده تورکسوی اؤندرلیگینده تورک جمهوریتلری اوپرا و باله مودورلری ۳.جو ییغینجاغی گئرچکلشدیریلدی. ییغینجاقدا ۲۰۲۵.جی ایلده ائدیله‌جک ایشلر اله آلیندی.

۲۶ سپتامبر ۲۰۲۴ تاریخینده بوداپست شهرینده بین الخالق شطرنج فدراسیونو عمومی قورولو تشکیل ائدیلدی. بو عمومی قورولدا تورک اؤلکه‌لری شطرنج بیرلیگی قورولدو. تورک اؤلکه‌لری شطرنج بیرلیگی آذربایجان، قازاقیستان، قیرقیزیستان، اؤزبکیستان، تورکمنیستان و تورکیه‌دن میدانا گلیر.

۲۷ سپتامبر ۲۰۲۴ تاریخینده ایستانبول شهرینده تورکیه-اؤزبکیستان تحصیل فورومو تشکیل ائدیلدی. فوروما ایکی اؤلکه عالی تحصیل تشکیلاتی باشقانلاری، اونیورسیته باشقانلاری و متخصصلر قاتیلدی. فورومدا تورکیه-اؤزبکیستان عالی تحصیل تشکیلاتلاری ایش بیرلیکلری، صونعی ذکا، یوکسک تکنولوژی باشلیغی آلتیندا ایجلاسلار گئرچکلشدیریلدی.

۲۸ سپتامبر ۲۰۲۴ تاریخینده ایستانبول شهرینده بین الخالق تورک مدنیت و میراث وقفی طرفیندن تورک دونیاسیندا مد‌نی میراث و قوروما آدلی کنفرانس گئرچکلشدیریلدی. کنفرانسدا تورک مدنیتینی قورومانین یوللاری، باشقا اؤلکه‌لرین تجروبه‌لری کیمی مؤوضوعلار مذاکیره ائدیلدی.