بیرلشمیش میللت‌لر تشکیلاتی‌‌نین بوتون عضو‌لره چاغریسی

بیرلشمیش میللت‌لر تشکیلاتی‌نین تهلوکه‌سیزلیک شوراسی بوتون عضو‌لره "باش کاتیب آنتونیو گوترش‌ین وظیفه‌سینی بالتالایا‌جاق حرکت‌لردن چکینمه" چاغیریشینی ائتدی.

سوئیس‌ین بمت-ده‌کی دایمی نوماینده‌سی پاسکال بائریسویل قاپا‌لی بیرلشمیش میللت‌لر تشکیلاتی‌نین تهلوکه‌سیزلیک شوراسی ایجلاسیندان سونرا 15 عضو آدیندان آچیقلاما وئردی. بو، ایسراییلین بمت باش کاتیبی آنتونیو گوترشی "آرزو اولونماز شخص" اعلان ائتمه‌سیندن سونرا گلدی.

بیرلشمیش میللت‌لر تشکیلاتی‌نین تهلوکه‌سیزلیک شوراسی عضو‌لری‌نین "گوترش و اونون بمت-ده اوینادیغی چوخ بؤیوک رولا تام دستک وئردیک‌لری”نی بیلدیرن پاسکال بائریسویل ثمره‌لی و تأثیرلی علاقه‌لر قورمانین واجیب‌لیگینه دقت چکدی. او، "بوتون عضو‌لر باش کاتیبین وظیفه‌سینی بالتالایا‌جاق حرکت‌لردن چکینمه‌لی‌دیر" ایفاده‌سینی ایشلتدی.

خاطیرلاداق کی، ایسراییل حکومتی یاخین شرقده گرگینلیگین عاجیل اولا‌راق آزالدیلماسینا چاغیران گوترشی "آرزو اولونماز شخص" اعلان ائده‌رک اؤلکه‌یه گیریشینه قاداغا قویدوغونو بیلدیرمیشدی. بمت باش کاتیبی‌نین 1 اوکتبردا  وئردیگی آچیقلامادا ایسراییله آتیلان راکت‌لرله باغلی ایرانین آدینی چکمه‌دیگی و رسمی تهرانین هوجومونو بیرباشا قینامادیغی ادعا اولونموشدو.

آنتونیو گوترش‌ ایرانین راکت هوجومون‌دان سونرا ائتدیگی چیخیشیندا "یاخین شرقده موناقیشه‌نین گئنیشلنمه‌سینی قیناییرام" ایفاده‌سینی ایشله‌ده‌رک عاجیل آتیشکس وورغوسو ائتمیشدی.

ایسراییلین بو قراری‌نین آردیندان بمت تهلوکه‌سیزلیک شوراسی‌نین عضو اؤلکه‌لری و آوروپا بیرلیگی‌نین خاریجی ایشلر و تهلوکه‌سیزلیک سیاستی اوزره یوکسک نوماینده‌سی جوزپ بورل آنتونیو گوترشه دستک وئردیک‌لرینی آچیقلامیشدی‌لار.

امریکانین بمت-ده‌کی دایمی نوماینده‌سی لیندا توماس گرینفیلدین ایسه بمت-ده‌کی چیخیشیندا باش کاتیب‌دن هئچ بحث ائتمه‌مه‌سی و "امریکا ایسراییله تام، تام، تام دستک وئریر" شکلینده دانیشماسی دا دقت چکیب.