Tatar: “Bez Törkiyägä bik räxmätle”

İlbaşı Tatar Törkiyä Tışqı êşlär ministrı Xaqan Fidan belän Lefkoşada ütkärgän söyläşüdän soñ oyıştırılğan urtaq matbuğat oçraşuında çığış yasadı.

Törkiyäneñ här platformada Tön’yaq Kipr Törek Cömhüriyätenä kürsätkän yaqlawına iğ’tibarnı yünältüçe Tatar: "Ğadel bulmağan global’ moxitta Kipr törek xalqınıñ üz tabiği xoquqlarınıñ täêmin itelüe, suveren häm tigez xalıqara statusınıñ raslanuı öçen zur köräş alıp barabız. Şuşı däräcäle yulıbızda bezne här platformada yaqlawçı, bezneñ belän bergä bulğan, däwlätebezne alğa taba alıp baru häm layıq bulğan statusqa qawıştıru öçen böten mömkinleklärne mobilizaśiyälägän töp watanıbızğa bez bik räxmätle”, - dip äytte.

Tışqı êşlär ministrı Xaqan Fidan isä: “Kiprda ike däwlätle çişeleştän tış başqa çişeleşneñ bulmawın härkem kürä”, - dide.

Fidan: “Kipr törekläreneñ 50 yıl buyı duçar bulğan izolyaśiyäse tawışsız keşelek cinayätenä äylände. Monıñ tawışsız urtaqları bar. Belep yäisä belmiçä monı başqaralar. Bu wazğiyätneñ Kipr xalqına mömkin qadär äzräk täêsir itüe öçen qulıbızdan kilgänçä barısın yasıybız. Soñğı 50 yılda utrawda ber çınbarlıq barlıqqa kilde. İke däwlätle çişeleştän tış, utrawdağı barlıqnıñ raslanuınan tış başqa ber çişeleşneñ bulmawın härkem kürä”, - dip belderde.

Töp çaqırunu Kön’yaq Kipr grek citäkçelegeneñ watandaşlarına häm säyäsi liderlarına yasarğa teläwenä işarät itüçe Fidan: "Alar da Kipr utrawınıñ tağın da alğa taba modern räweştä, üseş alğan itep, kileşü yaqlı, tınıç yul belän häm qurqınıçsızlığı axırğaça garantiya astına alınuın telilär ikän, ul çaqta mondıy çişeleşlärne tormışqa aşıruda qıyu itep xäräkät itüläre kiräk. Min biredän üzlären qıyu bulırğa çaqıram”, - dide.

Fidan, Tön’yaq Kipr belän här ölkädä xezmättäşlekne arttırırğa däwam itäçäklären belderep, Greśiyä belän Törkiyä arasında östenlek itkän uñay säyäsi atmosferanıñ utrawda da çağılış tabuın teläwlären iskärtep uzdı.

Törkiyä tışqı êşlär ministrı: “Greśiyäneñ, Törkiyäneñ, Tön’yaq Kipr Törek Cömhüriyäteneñ häm Kön’yaq Kipr grek idaräseneñ cıyılışıp tağın da yaxşıraq kiläçäkne töbägebezdä tözüe mömkin”, - dip äytte.