Ärdoğan: “İzrailneñ yasıy alaçaq härtörle adımın kontrol’ astında totabız”

İlbaşı Ärdoğan Albaniyäğä häm Serbiyägä yasağan räsmi säfärlärennän qaytqan çaqta oçqıçta jurnalistlarğa belderülär yasadı, sorawlarğa cawap birde.

Ärdoğan: "İzrail barı tik höcüm itkän Fälästin häm Livannıñ totrıqlılığın ğına tämek itep almıy. Andağı yanğınnıñ tirä-yaqqa yoğıntılarınıñ buluı öçen dä tırışa. Bolarnı bezneñ iğ’tibarsız qaldıruıbız mömkin tügel. Bez bolarnıñ barısın da beläbez. Qullarıbız bäyle tormıy. Älbättä, cämğiyätkä yanawçı härtörle riskka qarşı xökümätebezneñ bilgeläw häm yuqqa çığaru êşçänlege bar", - dip belderde.

Törkiyä Däwlät başlığı: "İzrail – regional’ häm global’ tınıçlıqqa qarşı iñ anıq yanaw. Bu yanawnı dönya tınıçlığın saqlaw wazıyfasın üz östenä aluçılar beterergä tiyeş”, - dip äytte.

İzrailneñ Livanğa, Bäyrutqa häm Dimäşqkä qarşı höcümnäre iskä töşerelep: "Açıqtan-açıq Livannan soñ Dimäşqne basıp alaçaqların äytälär. Dimäşqne yawlap alu İzrail xärbiläreneñ Törkiyä çigenä kilep citüe dimäk, Süriyä kartasınıñ tulısınça bülgälänelüe dimäk. Bez moña qarşı närsä yasıy alabız?” - digän soraw uñayınnan Ärdoğan İzrailneñ Dimäşqne yawlap alğan oçraqta Süriyäneñ tön’yağına kilgän bulaçağına iğ’tibarnı yünältte.

İlbaşı Ärdoğan: "İzrailneñ qayber isäpläwläre bulırğa mömkin, ämma iñ zur xisap Allah Täğaläneke. Netan’yaxu häm bandasınıñ xıyalları qurqınıç töşlärenä äylänäçäk. Fälästin irekle bulaçaq, Livan irekle qalaçaq. Qanlı qulların suzğan härber cir kisägendä watannarın yaqlawçı batır irlärneñ xaqlı häm däräcäle qarşılıq kürsätüe belän oçraşaçaq. Ciñü, hiçşiksez, sabır itüçeneke bulaçaq”, - dip äytte.

Ärdoğan: "İzrail regional’ häm global’ tınıçlıqqa qarşı iñ tögäl yanaw. Bu yanawnı dönya tınıçlığın saqlaw wazıyfasın üz östenä aluçılar beterergä häm tınıçlıqnı saqlarğa tiyeş”, - dide.

Süriyädäge watandaşlar suğışınıñ başınnan birle Rusiyäneñ yasayaçaq adımnarın iğ’tibar belän küzätep barularına basım yasawçı Ärdoğan bolay dip bäyäläw yasadı:

"Çönki Rusiyä Süriyä belän urtaq xäräkät itä. İran belän bäyle mäs’älädä dä, Rusiyä, İran, Süriyä, böten bu öç yaqlı mexanizm bergä xäräkät itä. İkençe yaqtan isä Amerika, Angliyä, Germaniyädän torğan koaliśiyä köçläre tora. Koaliśiyä köçläre “PKK/YPG” terror oyışmasına yärdäm itä.

Süriyäneñ cir bötenlegenä qarşı iñ zur yanaw bulıp torğan şuşı wazğiyätkä qarata Rusiyä, İran häm Süriyäneñ tağın da täêsirle çaralar kürüe bik möhim. Oxşaş şartlar Ğıyraqta da yäşänä.

Şuña kürä, ber yaqtan, İzrailneñ suğışnı böten töbäkkä cäyelderü tırışuları, ikençe yaqtan, terror oyışmalarınıñ separatist häm cimergeç êşçänlege bulğan çaqta, keçkenä mänfäğät isäpläwlären çitkä quyıp torıp, teläktäşlek êçendä töbäkne qotqaruıbız kiräk".