Törki däwlätlärneñ “Türktransplant” sisteması

Azärbaycannıñ Şuşa şähärendä Törki däwlätlär oyışmasınıñ 4nçe Sälamätlek saqlaw ministrları cıyılışı ütkärelde.

Azärbaycan sälamätlek saqlaw ministrı Täymur Musayevnıñ qabul itüendäge cıyılışta Törki däwlätlär oyışması ğomum särqatibe, tulı wäqalätle ilçe Kubanıçbäk Ömüraliyev, Törkiyä sälamätlek saqlaw ministrı Kemal Mämişoğlu, Qırğızstan sälamätlek saqlaw ministrı Alımkadır Bäyşänaliyev, Üzbäkstan sälamätlek saqlaw ministrı urınbasarı Davron Soltanov belän Qazaqstan sälamätlek saqlaw ministrı urınbasarı Yerbol Ospanov qatnaştı.

Musayev cıyılışta yasağan çığışında Törki däwlätlär oyışmasına äğ’za häm küzätüçe illär arasında berdäm mediśina fänni ölkäseneñ buldırıluın, urtaq ğilmi tikşerenülärneñ ütkärelüen häm urtaq mediśina beleme standartlarınıñ bilgelänelüen urtaq êşçänlekneñ töp yünäleşläre bularaq kürülären äytte.

Cıyılıştan soñ ministrlar Törki däwlätlär oyışması qısalarında organ häm tuqıma transplantaśiyäse mäs’äläsendä mäğ’lümat häm täcribä belän urtaqlaşuğa mömkinlek täêmin itäçäk "Türktransplant" sistemasınıñ buldırıluı turında niyät protokolına qul quydı.

Monnan tış Törki däwlätlär oyışmasına äğ’za häm küzätüçe illärneñ sälamätlek saqlaw ministrlıqlarınıñ fänni tikşerenü institutları arasında onkologiyä, kardiologiyä, oftal’mologiyä, pediatriya, travmatologiyä häm ortopediya ölkälärendä kileşü memorandumnarı imzalandı.