Qırım tatarlarınıñ xalıq mäclese wäkile Törkiyägä kilde

Rusiyädä törmädä bulıp, küptän tügel genä irekkä çıqqan Qırım tatarlarınıñ xalıq mäclese räise urınbasarı Näriman Cälal Törkiyägä säfär yasadı. 8nçe oktyabr’dä Änkarağa kilgän qunaqnı Törkiyä ilbaşınıñ baş kiñäşçese Yalçın Topçu qabul itte. Oçraşuda Ukrainanıñ Änkaradağı ilçelege häm keşe xoquqları oyışmalarınıñ wäkilläre dä qatnaştı. Anda Rusiyä annekśiyälägän Qırımdağı soñğı wäzğıyät’, qırım tatarlarınıñ xäle häm säyäsi mäxkümnärneñ problemaları qaraldı.  

Oçraşuda Yalçın Topçu Törkiyäneñ Ukraina territoriyäse bötenlegen, suverenlığın häm bäysezlegen yaqlawın xäterlätte. Ul il wäqalätleläreneñ barlıq platformalarda Qırım häm başqa basıp alınğan töbäklärneñ xalıqara xoquq nigezendä kire birelüe kiräklegen yaqlawın da süzlärenä östäde.

Näriman Cälal isä Törkiyä ilbaşı Räcäp Tayyip Ärdoğanğa Ukrainağa teläktäşlege öçen räxmätle buluın citkerde. Ul Qırımdağı basımnar turında söyläde häm 60 yäşennän ölkän säyäsi ğayeplänüçelärneñ mäxkämägä awıru xäldä kiterelülären äytte.  

Ukraina ilçelege wäkile Denis Zolotaryev Cälalnıñ irekkä çığuınıñ Törkiyä häm Ukrainanıñ berdäm tırışlığı näticäsendä buluın assızıqladı. Ul Ärdoğanğa Ukraina watandaşların Rusiyädäge äsirlektän qotqaru öçen kürsätkän yärdäme öçen räxmäten belderde.