Törki däwlätlär oyışmasınıñ ênergetika cıyılışı

Qırğızstan ênergetika ministrlığınnan yasalğan belderügä kürä, ministr Taalaybek İbrayevneñ qabul itüendäge cıyılışta Törkiyäne Ênergetika häm tabiği çığanaqlar ministrı urınbasarı Äxmät Bärat Çonkar wäkillek itte.

Cıyılışta Azärbaycan ênergetika ministrı Parviz Şahbazov, Qazaqstan ênergetika häm tabiği çığanaqlar ministrınıñ berençe urınbasarı Sungat Äsimxanov, Üzbäkstan ênergetika ministrı urınbasarı Bahtiyor Mamatkarimov, Macarstan (Vengriyä) tışqı iq’tisadi mönäsäbätlär häm tışqı êşlär ministrlığı kiñäşçese Petr Starai, Törki däwlätlär oyışması ğomum särqatibe Kubanıçbäk Ömüraliyev belän bergä Törkiyä, Macarstan (Vengriyä), Azärbaycan häm Qazaqstan tulı wäqalätle ilçeläre häm küzätüçe äğ’za däwlätlärneñ wäkilläre qatnaştı.

Cıyılışta Törki däwlätlär oyışmasına äğ’za illär arasında ênergetika tarmağında xezmättäşlekneñ nığıtıluı, texnologiyälär häm yäşel iniśiativalar öçen regional’ üzäkneñ buldırıluı, ênergetika tarmağında êşläwçelär arasında ber yıllıq hönäri ostalıq bäygeläreneñ oyıştırıluı, ênergetika ministrlarınıñ çirattağı cıyılışınıñ bilgelänelüe mäs’äläläre qarap çığıldı häm ênergetika tarmağındağı törle mäs’älälär häm täq’dimnär bäyälände.

Qırğızstan ênergetika ministrı İbrayev yasağan çığışında cıyılışnıñ törki dönya illäre arasında ênergetika ölkäsendä xezmättäşlekneñ häm üzara bäyläneşneñ köçäytelüe yünäleşendä yasalğan tağın ber adım buluın belderep, ênergetika tarmağınıñ urtaq üseş aluına öleşläre häm yaqlawları öçen räxmäten citkerde.

İbrayev törki däwlätlärneñ ênergetika ministrlıqlarına ênergiyä yünäleşlären törleländerü mömkinlegen iğ’tibarğa alırğa häm perspektivalı ênergetika proyektlarınıñ tormışqa aşırıluında aktiv rol’ uynarğa täq’dim itte.

Qatnaşuçılar da regional’ texnologiyä häm yäşel iniśiativalar üzägeneñ tözelüen qarap çığarğa äzer buluların belderde.

Taraflar illär arasında êlektr belän täêmin itü häm almaşu ölkäsendä xezmättäşlekne däwam itärgä äzer buluların iskärtep uzdı.

Cıyılış Yomğaq beldergeseneñ qul quyıluı belän tögällände.