Germaniyä belän Üzbäkstan arasında migraśiyä kileşüe

Germaniyä êçke êşlär ministrlığınnan yasalğan yazmaça belderüdä Kanśler Olaf Şol’śnıñ Üzbäkstan säfäre waqıtında ike il arasında imzalanğan migraśiyä kileşüeneñ êşçe köçe häm kvalifikaśiyäle êşçe migraśiyäseneñ nığıtıluı belän bergä Germaniyädä qalu xoquqı bulmawçılarnıñ illärenä kire cibärelüe mäs’äläsendä tağın da yaqınraq xezmättäşlekne üz êçenä aluı belderelde.

Êçke êşlär ministrı Nênsi Fezer migraśiyä kileşüe belän bäyle bularaq: "Germaniyädä qalırğa xoquqı bulmağan keşelärneñ kire cibärelüeneñ êffektiv räweştä ütälüe tärtipsez migraśiyäneñ çikländerelüe cähätennän möhim. Monıñ öçen yaxşı tärtipkä salularda kileştek. Şul uq waqıtta Üzbäkstannan kilgän kvalifikaśiyäle êşläwçelär öçen êçke bazarıbızda häm Germaniyädä mäğarif häm yuğarı belem öçen forsatlar täq’dim itäbez. Çönki bik küp tarmaqta çit ildän yaxşı belemle êşçe köçenä häm kvalifikaśiyäle êşçelärgä aşığıç räweştä ixtıyacıbız bar”, - dip äytte.

Kanśler Olaf Şol’ś ta Üzbäkstanda yasağan belderüendä: "Bu kileşü bez xäzerge waqıtta dönya külämendä bik küp il belän adım adım tözergä telägän kileşülärneñ modelen täq’dim itä. İq’tisadıbıznıñ üsä aluı öçen bez Germaniyädä ixtıyac toyğan êşçe köçeneñ migraśiyäsen ciñeläytäbez. Ber ük waqıtta kire qaytırğa tiyeş bulğannarnıñ monı yasıy aluı öçen ğadi, byurokratik bulmağan prośeduralar östendä kileşäbez”, - dip bäyäläw yasağan ide.

Germaniyä şuşındıy uq kileşüne moña qadär Keniyä, Görcestan (Gruziyä), Hindstan, Kolumbiyä häm Marokko belän dä imzalağan ide.