Tatarstan Räise Mintimer Şäymiyevne tuğan köne belän qotladı

Tatarstan Räise Röstäm Miñnexanov üzeneñ Telegram-kanalında Tatarstannıñ Däwlät kiñäşçese, respublikanıñ berençe ilbaşı Mintimer Şäymiyevne tuğan köne belän qotladı.

“Möxtäräm Mintimer Şäripoviç, ixlas yöräktän tuğan könegez belän qotlıym! Sezneñ ziräklegegez, Watanıbızğa, xalqıbızğa bulğan mäxäbbätegez häm tuğrılığığız tirän ixtiram uyata. Sezgä soqlanabız, ilküläm danğa iyä ostaz buluığız belän ğorulanabız! Sezga ozın ğomer häm nıqlı sälamätlek telim”,- diyelä Röstäm Miñnexanovnıñ qotlawnamäsendä.

Respublikanıñ Däwlät kiñäşçese, Rusiya Xezmät Geroyı, tanılğan däwlät häm cämäğat’ êşleklese, bäxässez avtoritetqa häm xörmätkä iyä şäxes, Tatarstannıñ berençe ilbaşı Mintimer Şärip ulı Şäymiyevkä 20 nçe ğıynwarda 88 yäş’ tuldı.

Qazan BRİKS uyınnarın qabul itärgä äzer

Tatarstan başqalası mêrı İlsur Metşin beldergänçä, Qazan qışqı BRİKS uyınnarın uzdıruğa äzer. Şähär infrastrukturası xalqara standartlarğa turı kilä.

“Bez BRİKS qışqı uyınnarın qabul itärgä äzer häm monı êşlärgä şat buşaçaqbız. Qazan sport yarışları sanına qarap barlıq kiräkle ob’yektlarnı täq’dim itärgä äzer”,- dide İlsur Metşin. 

Uzğan yılnıñ iyün’ ayında Qazan BRİKS uyınnarın qabul itte. Anda dön’yanıñ yaqınça 100 ilennän sportçılar qatnaştı.

Tatarstanda 2024 nçe yılnıñ 10 ayında tuuçılar häm ayırılışuçılar sanı kimegän

”Tatarstanstat” mäğ’lümatlarına qarağanda,  Tatarstanda 2024 nçe yılnıñ ğıynwar-oktyabr’ aylarında 29 meñ 200 bala tuğan. Bu 2023 nçe yılnıñ şul uq çorı belän çağıştırğanda 3,51%qa kimräk. Uzğan yılnıñ 10 ayı näticälärenä qarağanda, respublikada 1000 keşegä 8,8 bala turı kilä. Annan êlekke yılda ul 9,1 bulğan.

2024 nçe yılnıñ berençe 10 ayında respublikada ülüçelär sanı 37 meñ 800 keşegä qadär artqan. Bu ber yıl êlek şul uq çor belän çağıştırğanda 6,6%qa kübräk.

Ğailä qoruçılar statistikasına kilgändä, 2024 nçe yılnıñ 10 ayında Tatarstanda 20 meñ 700 nikax terkälgän. Bu 2023 nçe yılnıñ şul uq çorı belän çağıştırğanda 3,1%qa kimräk.

Şul uq waqıtta respublikada ayırılışuçılar sanı kimegän. 2023 nçe yılnıñ 10 ayında 12 meñ par ayırılışqan bulsa, 2024 nçe yılnıñ şul uq çorında alarnıñ sanı 11 meñ 100 bulğan.

Qazanda Kamal teatrınıñ yaña binası açıldı

20 nçe ğıynwarda Qazanda Kamal teatrınıñ yaña binası açıldı. Anı açu tantanası “Tuğan tel” cırı häm Tatarstannıñ xalıq artistı İldus Äxmätcanov başqaruında Tuqaynıñ “Teatr” şiğıre belän başlanıp kitte. Çarada Tatarstan Räise Röstäm Miñnexanov, Rusiya mädäniyät ministrı Ol’ğa Lyubimova häm başqa zur qunaqlar qatnaştı.

Açılu tantanası Tatarstan Respublikası mädäniyät ministrlığınıñ yıl yomğaqlarına bağışlanğan kollegiya utırışı belän däwam itte.

Törkiyädäge uramğa tatar keşese iseme birelde

Törkiyäneñ Tavşanlı rayonındağı Dädälär bistäsendä iñ ozın uramğa tatar keşese Räxmi Oruç Güvänç iseme birelde. Räxmi Oruç Güvänç – Törkiyädä İdel-Ural, Altay, Urta Aziya pentatonik muzıka tarixın, üzençäleklären fänni häm praktik yaqtan öyrängän, tanıtqan muzıka belgeçe, psixolog. Bu xaqta “Tatar-inform”ğa Törkiyädä yäşäp ,icat itüçe jurnalist, yazuçı Ayziräk-Gäräyeva xäbär itä.

Tapşıruda Tatarstan Räiseneñ matbuğat xezmäte häm “Tatar-inform” xäbär agentlığı  yazmaları qullanıldı.