Tatarstan xäbärläre 50/2024

Yaña yıl çığımsız bulsın

Tatarstan räise Röstäm Miñnexanov muniśipalitet başlıqlarına Yaña yıl bizäleşenä artıq çığımnar totmasqa quştı. “Yaña yıl aldınnan tradiśion räweştä şähär häm rayon citäkçelekläre bäyräm bizäleşe yasarğa tiyeş. Finans çığımnarsız”,-dide ul. Şul uq waqıtta, Tatarstan räise şähär häm rayonnarda üzäk çırşılarnı bizäwgä bäyge iğ’lan itärgä kürsätmä birde. Monnan tış, bäyräm çorında mädäni, sport häm başqa massaküläm küñel açu çaralarına iğ’tibar birelergä tiyeş. Anda iminlek täêmin itügä isä ayırım basım yasala.

Qzanda bıyıl Yaña yıl uñayınnan zur şähär salyutı bulmayaçaq. Şähär mêriyäse “Tatar-inform” agentlığına “Bezdä mondıy tradiśiyä yuq” dip cawap birgän. Qazanlılar bıltır da Yaña yılnı salyutsız qarşı alğan ide.

“Şüräle” häm “Su anası” patentlana alamı?

Tatarstannıñ Rusiyä Däwlät Dumasındağı deputatı Ayrat Färraxov “Naśional’nıyı igruşki” (Milli uyınçıqlar) dip ataluçı cämğıyät’neñ tanılğan tatar äkiyätläre geroylarınıñ isemnären tovar bilgese bularaq terkäwenä qarşı çıqtı. Ul bu nisbättän Tatarstan prokurorı Al’bert Suyargulovqa möräcäğat’ yulladı. Anda ädäbi geroylarnıñ isemnäreneñ milli miras buluı häm tatar mädäniyatınıñ baylığın gäwdäländerüe äytelä. “Avtor xoquqı iyäse bulğan şirkätneñ tatar äkiyätläre geroylarınıñ isemnäre kilep çığışına qatnaşı yuq” dip assızıqlıy deputat. Ul “Naśional’nıyı igruşki” şirkäte êşçänlegen xoquqıy yaqtan tikşerüne sorıy. İsegezgä töşeräbez, älege cämğıyät’ “Äkiyät” qurçaq teatrınnan Şüräle häm Su anası kebek ädäbi

Qazanda - törek kähwäse köne

5nçe dekabr’dä Bötendön’ya törek kähwäse köne bilgeläp ütelä. Näq’ menä älege könne 2013nçe yılda anı UNESCOnıñ matdi bulmağan mädäni miras isemlegenä alalar. Bötendön’ya törek kähwäse könenä bağışlanğan çara Qazanda Törkiyä konsullığında da uzdı. Tantanağa kilüçelärne baş konsul Uğur Yılmaz sälamläde. Ul üze kähwä belän bäyle tradiśiyälär turında söyläde häm, xätta, anı äzerlärgä dä öyrätte. “Törekçä kähwä êçü - bezneñ mädäniyatnıñ ayırılğısız öleşe, anıñ 500 yıldan artıq tarixı bar” dip söyläde konsul. Ul älege xuş isle êçemlekneñ yawçılaw, qunaqlar qabul itü häm başqa ğoref-ğadätlärneñ alıştırğısız öleşenä äwerelüen citkerä. Kiçädä qatnaşqan härkem üze qaynar qom östendä törek kähwäse peşerep qarıy aldı. Çarada Tatarstannıñ xalıq artistı Êl’mira Kälimullina çığış yasadı.

Tatar şağıyre Törkiyädä şiğır’ festivalendä qatnaştı.

Tatar şağıyre Rüzäl Möxämmätşin Törkiyäneñ “Xazar şiğri kiçläre” dip ataluçı ädäbi festivalendä qatnaştı. Bu xaqta Tatarstannıñ yazuçılar berlege xäbär itä. Çara Êlazığ şähärendä 29nçı noyabr’dän 1nçe dekabr’gä qadär uza. 27nçe tapqır oyıştırılğan festival’dä bıyıl Törkiyäneñ üzennän, Azärbaycannan, Üzbäkstannan, Qırğızstannan häm başqa illärdän şağıyr’lär qatnaşa.

Älege çaranıñ töp maqsatı - törki däwlätlär häm töbäklär arasında bäyläneşlärne nığıtu, törki ädiplärne berläşterü.

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı, Tatarstan räiseneñ räsmi portalı häm başqa räsmi çığanaqlardan faydalanıldı.