Röstäm Miñnexanov Qıtaynıñ Sıçuan’ provinśiyäsenä säfär qıldı

Tatarstan Räise Röstäm Miñnexanov uzğan atnada êş säfäre belän Qıtaynıñ Sıçuan’ provinśiyäse Çêndu şähärenä kilde. Ul ber könlek säfär qısalarında qayber kompaniyälärdä buldı, şähär territoriyälären üsterü proyektları belän tanıştı, räsmi oçraşular ütkärde.

Tatarstan Räise şulay uq Sıçuan’ provinśiyäseneñ Tuğandaş şähärlär üzägendä Tatarstan pavil’onında buldı.

Respublikanı Sıçuan’ provinśiyäse belän säwdä-iq’tisadi, fänni-texnik häm mädäni xezmättäşlek turında Xökümätara kileşü bäyli.

Tatarstan Räise Qazan universitetına uñışlar teläde

Tatarstan Räise Röstäm Miñnexanov üzeneñ sośial’ çeltärlärendä Qazan universitetın 220 yıllığı belän qotladı.

“Yuğarı uqu yortı küp’yıllıq tarixında kürenekle keşelär pleyadasın tärbiyäläde, alar Qazan universitetın tämamlawçı isemen ğorur yörtä! Studentlarğa uquda uñışlar telim. Bez universitetıbız belän ğorurlanabız. Aña uñışlar häm yaña açışlar telibez” diyelä Tatarstan Räiseneñ qotlawında. Ul yuğarı uqu yortınıñ fänni-pedagogik sostavına räxmät süzläre dä citkerde.

Qazan dekabr’dä arzanlı yal itärgä mömkin bulğan şähärlär isemlegenä kergän

Qazan dekabr’dä otışlı oçıp barıp häm yal itep bula torğan Rusiya şähärläre reytingında ikençe urınnı aldı. Turistlıq firmalarnıñ tikşerenü näticälärenä qarağanda, Rusiya şähärlärennän Tatarstan başqalasına oçu urtaça 6 meñ 500 sumğa töşä, ä “öç yoldızlı” qunaqxanädä yäşäw bäyäse töngä 4 meñ sum bula.

Tatarstan başqalasına qarağanda arzanraq yal Pskovta ğına, anda oçış 6 meñ sum, ä qunaqxanädä tön qunu 3 meñ sumğa töşäçäk.

Qazanda turistlıq salımı kertü turında qarar räsmi räweştä qabul itelde

2025 nçe yılnıñ 1 nçe ğıynwarınnan Qazanda otel’lär häm qunaqxanälärdä yäşäw bäyäsennän 1% külämendä turistlıq salımı tülätelä başlıy. Korrupśiyägä qarşı êkspertiza uzğannan soñ qarar proyektı Qazan şähär Duması utrırışında räsmi räweştä qabul itelgän.

Salımnı oyışmalar häm fizik zatlar, şul isäptän şäxsi êşmäkärlär – otel’lär, qunaqxanälär, xostellar, şifaxanälär, pansionatlar, yal bazaları, kempinglar, motel’lär häm “urnaştıru çaraları” reestrına kertelgän başqa ob’yektlar xucaları tüläyäçäk.

Salımnıñ stavkaları salım kodeksına yaraşlı räweştä bilgelänäçäk häm yıl sayın 1% punktına arttırıla baraçaq. Äytik, 2025 nçe yıda salım küläme 1%nı täşkil itsä, 2029 nçı yılda 5% bulaçaq.

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.