Tatarstan xäbärläre 47/2024
Tatarstandağı häm tatar dön’yasındağı qayber waqıyğalarğa qısqaça küzätü
Dön’yanıñ törle poçmaqlarında yäşäwçe tatar êşmäkärläre Qazanğa cıyıldı.
Qazanda “Tatarstannıñ êşlekle xezmättäşläre” forumı uzdı. Anda Rusiyäneñ 60 töbägennän häm 14 çit ildän barlığı 400 êşmäkär qatnaştı. Aralarında Törkiyä wäkilläre dä bar ide. Forum bıyıl 3 könlek programma nigezendä äzerlängän. Anıñ töp maqsatı - dön’yanıñ törle poçmaqlarında yäşäwçe tatar êşmäkärlären ber mäydanğa tuplaw. Cıyın qısalarında Bötendön’ya tatar kongressınıñ Milli şura utırışı da uzdı.
Ğabdulla Tuqay medalen buldırırğa täq’dim itelde
Bötendön’ya tatar kongressınıñ Milli şura utırışında Ğabdulla Tuqay medalen buldıru täq’dime yañğıradı. Anı Tatarstan Fännär akademiyäse citäkçese Rifqat’ Miñnexanov citkerä. “2026nçı yılda Ğabdulla Tuqaynıñ tuuına 140 yıl bula, şuña bäyle räweştä täq’dimnär bar. Berençedän, Tuqaynıñ täğ’limatların tormışqa aşırğan öçen medal’ çığaru turında ukaz qabul itü. İkençedän, Tuqay premiyäsenä xalıqara däräcä birü”,-dide ul.
“Qazanda Könçığış bazarı”
25nçe noyabr’dä “Qazanda Könçığış bazarı” xalıqara mädäniyatlar festivale başlanaçaq. Çarağa 33 ildän wäkillär kilüe kötelä. Tantanalı açılış Qazan ratuşasında uzaçaq. Festival’ 3nçe märtäbä oyıştırıla häm ul üzeneñ yaña proyektları belän zur qızıqsınu uyata. Qatnaşuçılardan 300läp ğariza kilgän. İcadi çığışlardan tış, çaranıñ fänni yağı da bar. Tatarstan fännär akademiyäsendä Könçığış häm Aziyä illäre belän mädäni xezmättäşlekkä bağışlanğan kiñäşmä ütäçäk. Anda Üzbäkstan, Qazaqstan, Azärbaycan, İran, Nigeriya häm Franśiyädän tanılğan mädäniyat belgeçläre, fälsäfäçelär kilergä teläk beldergän. Festival’ qısalarında legendar “Yalla” törkeme konśertı bulaçaq.
Tağın ber tatar balası “Tawış” yarışında
Qazannan Säyet Ğaliullin Rusiyäneñ “Berençe kanal”ında baruçı “Tawış. Balalar” proyektı finalına çıqtı. Ul bäygeneñ östämä êtabında 59% tawış cıyğan. Köndäşläre isä 4 häm 36 prośent tawış aluğa ireşkän. Kiläse çığarılışta Säyet Ğaliullin ciñüçe bulu häm 1 million sum külämendä gran-pri alu öçen yarışaçaq.
Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı, Tatarstan räiseneñ räsmi portalı häm başqa räsmi çığanaqlardan faydalanıldı.
