Tatarstan xäbärläre 41/2024

Finlyandiya tatarları turında kitap törekçä basılıp çıqtı

1nçe oktyabr’ könne Törkiyä başqalası Änkarada “Finlyandiya tatarları” dip ataluçı kitap täq’dim itelde. Älege çaranı Finlyandiya ilbaşı Aleksandr Stubbnıñ êşlekle säfärenä turı kiterdelär. Anda Törkiyäneñ mädäniyat häm turizm ministrı Mäxmät Nuri Ärsoy häm başqa wäqalätlelär qatnaştı. Kitapnı täq’dim itügä Finlyandiyädän 5 tatar kilgän ide. Avtorı Ramil Belyayev anı fänni xezmätenä nigezlänep yazğan. Kitapnı törekçägä tärcemä itü, bastıru häm Änkarada täq’dim itüne Törkiyä yağı başqarıp çığa.

 Milli tellärne saqlaw häm üsterü turında fiker alıştılar

Qazan mêriyasında milli tellärne saqlaw häm üsterügä bağışlanğan tügäräk östäl uzdı. Anda Tatarstan ministrlıqları, Fännär akademiyäse, Mäğarifnı üsterü institutı, Bötendön’ya tatar yäş’läre forumı wäkilläre häm başqa töbäklärdän çaqırılğan qunaqlar qatnaşa. Qazan mêriyäseneñ başqarma komitet citäkçese urınbasarı Güzäl Säğıytova äytüençä, mondıy oçraşular könüzäk mäs’älälärgä cawap tabarğa, wäzğıyat’kä bötenläy başqa yaqtan qararğa bulışa. Çarada Udmurtiyä häm Yakutiyä wäkilläre dä üz täcribäläre belän urtaqlaştı.  

Omskida tatar tele uqıtıla

Omskida “Aq qalfaq” xatın-qızlar oyışmasınıñ tırışlığı belän tatar tele uqıtıla başlıy. Bötendön’ya tatar kongressınıñ matbuğat xezmäte xäbär itkänçä, älegä tuğan tellären öyränergä teläwçe 2 distägä yaqın keşe kurslarğa yazılğan. Yäş’läre 15tän 40qa qadär. Uqıtuçılar isä 40 yıl stajı bulğan Asiya xanım Nazıyrova häm balalar baqçasında tärbiyäçe bulıp êşläwçe Êl’vira xanım Säxipova. Däreslär yäkşämbe könnärendä uza.

“Äkiyät”kä däğ’wa açılğan

Tatar däwlät “Äkiyät” qurçaq teatrına äkiyät geroyları isemnären qullanğan öçen yartı million sumlıq däğ’wa kilgän. Teatrnıñ sänğat’ citäkçese İlgiz Zäyniyev beldergänçä, nindider ber şirkät “Su anası”, “Qamır batır”, “Şüräle”, “Qazan xanbikäse”, “Qar qızı” atamalarına patent alğan. “Alar bezdän başta 500 meñ sum, ä annarı, küräsen, kassa cıyımnarınnan nindider prośentlar teli”,-di ul. Açıqlanğança, älege şirkät berni citeştermi, berni êşlämi, bernindi produkśiyäse yuq. Süzlärgä patent satıp alğannar da, şunıñ belän aqça êşlärgä cıyınalar. Zäyniyev, xalıqnıñ matdi bulmağan baylığın üzläşterügä yul quymayaçaqların häm mäxkämägä baraçaqların belderde.

Zölfiyä Qamalova belän xuşlaştılar

2nçe sentyabr’ könne Tatarstannıñ atqazanğan artistı, Awstraliyädä yäşägän cırçı Zölfiyä Qamalova belän xuşlaşu uzdı. Ul yaman şeş belän awırıp 18nçe sentyabr’dä 55 yäşendä wafat buldı. Xuşlaşu märasime internet aşa turıdan-turı kürsätelde. Anda Zölfiyä Qamalovanıñ qızı Zifa, ire Êndryu, apası Älfiyä, yaqınnarı, dusları häm icatın söyüçelär qatnaştı. Soñınnan märxümä başqaruındağı “Ay, bılbılım” cırı astında anıñ bala çağınnan başlap axırğı könnärenä qadärge fotoräsemnäre kürsätelde.

Yazmanı äzerlägändä “İntertat” êlektron gazetı, “Tatar-inform” mäğ’lümat agentlığı, “Azatlıq” säxifäse, Tatarstan räiseneñ räsmi portalı häm başqa räsmi çığanaqlardan faydalanıldı