Törki cömhüriyätlär kön tärtibendäge waqıyğalar

Qırğızstan, Tön’yaq Kipr Törek Cömhüriyäte häm Törkiyä ilbaşları N’yu - Yorkta Berläşkän Millätlär Oyışmasınıñ 79 nçı ğomum şurasında qatnaştılar. Citäkçelär küp sanda ike yaqlı oçraşular da ütkärdelär. Ğomum şura qısalarında Törki däwlätlär oyışmasına äğ’za illärneñ tışqı êşlär ministrları cıyılışı uzdı. Üzäk Aziya + AQŞ tışqı êşlär ministrları cıyılışı ütte. N’yu-Yorkta Astana platformasınıñ tışqı êşlär ministrları cıyılışı da uzdı. Oçraşuda İran, Rusiya häm Törkiyä tışqı êşlär ministrları qatnaştı.

24 nçe sentyabr’dä Törki xäbär agentlıqları berlege berlekneñ logotibı qabul itelüen belderde. 2023 nçe yılnıñ 6 nçı noyabrendä oyışqan Törki xäbär agentlıqları berlegeneñ äğ’zaları -  “Anadolu”, “Azertac”, “Kabar”, “Kazkontent” häm “ UzA” agentlıqları.

25-26 nçı sentyabr’dä Sämärkandta Aziya asqorma investiśiya bankı idarä şurasınıñ yıllıq cıyılışı ütte. Cıyılışta 100 dän artıq ildän 2 meñnän artıq wäqalätle qatnaştı. Üzbäkstan ilbaşı Şäwkät Mirziyoyev oçraşu açılışında qatnaştı häm çit il wäkilläre belän ayırım-ayırım cıyılışlar ütkärde.

26 nçı sentyabr’da Cälal-Abad şähärendä Törki däwlätlär oyışması turizm ministrlarınıñ 9 nçıı cıyılışı ütte. Cıyılışta 2025 nçe yılda Cälal-Abad şähäre Törki dön’yanıñ turizm başqalası dip iğ’lan itelde.

27 nçe sentyabr’dä Törekmänstan bäysezlegeneñ 33 yıllığın bilgeläp ütte. 27 nçe sentyabr’ 2018 nçe yıldan birle Törekmänstanda Bäysezlek köne itep qotlana.

 23 nçe sentyabr’dä Azärbaycan ilbaşı İlham Äliyev Üzbäkstan prem’yer-ministr urınbasarı Camşid Hocayevnı qabul itte. Oçraşuda Azärbaycan - Üzbäkstan ike yaqlı mönäsäbätlärendäge aktual’ mäs’älälär qaraldı.

24-26 nçı sentyabr’ könnärendä Baqıda 5 nçe Azärbaycan xalıqara saqlanu yärminkäse ütte. Yärminkägä 38 ildän 270 şirkät kilde. Yärminkäne açu tantanasında Azärbaycan häm Törkiyä cömhüriyätläre saqlanu ministrları qatnaştı. Biredä Azärbaycan ilbaşı İlham Äliyev dä buldı.

25 nçe sentyabr’dä Änkarada TÜRKSOY citäkçelegendä törki cömhüriyätlärneñ Opera häm balet citäkçeläreneñ 3 nçe cıyılışı uzdı. Cıyılışta 2025 nçe yılğa planlaştırılğan êşlär turında söyläştelär.

26 nçı sentyabr’dä Budapeştta Xalıqara şaxmat federaśiyäseneñ ğomum şurası ütte. Ğomum şurada Törki illärneñ şaxmat berlege tözelde. Törki illärneñ şaxmat berlege Azärbaycan, Qazaqstan, Qırğızstan, Üzbäkstan, Törekmänstan häm Törkiyädän tora.

27 nçe sentyabr’dä İstanbulda Törkiyä - Üzbäkstan mäğarif forumı ütte. Forumda ike ilneñ yuğarı belem birü oyışması başlıqları, rektorlar häm belgeçlär qatnaştı. Forumda Törkiyä belän Üzbäkstan arasında yuğarı uqu yortları xezmättäşlege, yasalma intellekt, yuğarı texnologiyälär iseme astında utırışlar uzdı.

28 nçe sentyabr’dä İstanbulda Xalıqara törki mädäniyät häm miras waqıfı tarafınnan “Törki dön’yada mädäni miras häm anı saqlaw” digän konferenśiya ütkärelde. Konferenśiyädä törki mädäniyätne saqlaw yulları häm başqa illärneñ täcribälare kebek temalar qaraldı.