Änkarada Qazan şähitlären häm Söyembikäne iskä aldılar

1552nçe yılda Yawız İvan ğaskärläre ütergän Qazan xanlığı şähitläre häm äsirlekkä töşkän Söyembikä xanbikäne Törkiyä başqalası Änkaranıñ Xaci Bayram Wäli universitetındağı Awraziya häm Törki dön’yanı tikşerü fänni-ğamäli üzägendä oyıştırılğan utırışta iskä aldılar.

Professor Naciyä Yıldız citäklägän çarada Qazan tatarı, tarixçı häm yazuçı Roza Qorban, törek tele häm ädäbiyatı ğalime Bilgä Ärciläsun, professor Xikmät Doğan häm başqalar çığış yasadı.

Cıyılış ber minut tınlıqtan belän başlandı, şunnan soñ Tuqaynıñ “Tuğan tel” şiğıre uqındı häm Törkiyä gimnı “İstiklal marşı” yañğıradı.

Roza Qorban üzeneñ çığışında tatar xalqı küñelendäge ärnetüçe waqıyğa bulğan 1552nçe yıl turında mäğ’lümat citkerde. Ul Qazan xanlığınıñ 125 yıllıq tarixındağı çorlarğa tuqtalıp, milli uyanu däwerendäge xannarnıñ kübeseneñ Qırım tatarları buluına basım yasadı. Tikşerenüçe-ğalim xanlqnıñ cimerelü säbäplärenä dä tuqtaldı.

Professor Bilgä Ärcilasun üz çığışında Qazan xanbikäse Söyembikä xaqında yazılğan äsärlär turında söyläde. Alarnıñ berse “Söyem bikä” romanın çarada qatnaşuçı Xikmät Doğan yazğan. Avtor äytüençä, ul student waqıtında Söyembikä turında ber tarix kitabında uqıy häm şul çaqtan birle älege tema belän qızıqsına başlıy. Xikmät Doğan xanbikäneñ yazmışı kitaplar yazıluğa ğına tügel, fil’m töşerügä layıq dip isäpli.

“Qazan şähitläre häm Söyembikä” dip atalğan çarada ğalimnär, studentlar, Qırım häm Qazan tatarları diasporası wäkilläre qatnaştı.