Pesi asrawnıñ faydaları

Mäçelär keşeneñ fizik häm psixik sälamätlegenä täêsir itä. Bu xaqta “Tatar-inform” mäğ’lümat agentlığı “Medicalexpress” fänni portalında çıqqan tikşerenü näticälärenä nigezlänep yaza.

Materialda assızıqlanğança, pesi asrawçılar öçen älege can iyäse - ğailäse, balası, iñ tuğrı häm sizger dustı. Bolay ğına da tügel, mäçelär belän yäşäwneñ yöräk-qan tamırları awırularınnan ülüdän saqlawı açıqlanğan. Şulay uq, öydä mondıy xaywan bulu êçäklek mikrobiotasına uñay yoğıntı yasarğa mömkin. Bu, bigräk tä, xatın-qızlarda yış kürelä. Mäçelär qandağı glyukoza däräcäsen kontrol’dä totunı yaxşırta häm yalqınsınunı kimetä ala.  

Keşe pesine sıypağanda, depressiyä xise yuqqa çığa. Östäwenä, tikşerenüdä qatnaşuçılarnıñ qayberläre mäçe tärbiyäläwneñ läzzät häm maqsat xisen arttıruın söyli.

Mäqalädä yazılğança, pesilär keşeneñ qayğırtu instinktın çaqırıp üzençälekle itep miyawlıy ala. Östäwenä, alar keşelärneñ üzlärenä möräcäğat’ itüen añlıy.