Mäskäwdä atışu

Rusiyädä “Wildberries” êlektron säwdä şirkäteneñ Mäskäwdäge üzäk ofisında atışu buldı. İr-atlardan toruçı 20-30 keşelek törkem işek töbenä kilep ut aça. Anda 2 saq xezmätkäreneñ ğomere özelä, yaralanuçılar bar. Waqıyğanı tikşerü barışında 28 keşe saq astına alınğan.

“Wildberries”qa nigez salğan Tat’yana Bakal’çuk beldergänçä, êlekkege ire Vladislav Bakal’çuk citäkçelegendäge törkem ofisnı basıp alırğa mataşqan. Ul poliśiyäne wäzğıyät’ne üz qulına alırğa çaqırdı.

Şirkät iyün’ ayında yaña śifrlı platforma buldıru öçen “Rus” reklama şirkäte belän berläşäçägen beldergän ide. Tat’yana Bakal’çuknıñ ire isä moña qarşı çığa. İyül’ axırında êşmäkär xanım “Wildberries”nıñ 1% akśiyälärenä iyä irennän ayırılu öçen mäxkämägä möräxäğat’ itte.