تورکیې په مزار شریف کې یو عصري ښوونځی جوړ کړ

د تورکیې د همکارۍ او همغږۍ ادارې  ( تیکا ) د افغانستان په مزار شریف کې د زده کوونکو لپاره په عصري معیارونو برابر یو لومړنی ښوونځی جوړ کړ.

د تیكا د  مزارشريف له دفتره په خپره شوې خبرپاڼه كې راغلي، د خالد بن وليد ولسوالۍ د محجوبه هروي لومړنی ښوونځی چې ۱۵۰۰ زده كوونكي لري او تر اوسه پورې په یو کرايي او زړې ودانۍ کې  فعالیت کولو ، د نوموړو زده کوونکو لپاره د عصري معیارونو سره د ښوونځي نوې ودانۍ جوړه کړه.

همداشان د ښوونځي اطراف او بڼ هم په عصري توګه جوړ شوي دي.

ددې سربیره د ښوونځي ټول اړتیاوې او تجهیزات تهیه شوي او ښوونځي ته سپارل شوي دي.

د ښوونځي د پرانستلو په مراسمو کې په مزار شریف کې د تورکیې جنرال قونسل قاسم کبان ، د بلح ولایت مرستیال والي نور الهادي ابو ادریس، د مزار شریف د تخنیکي دفتر همغږي کوونکي میکایل تاش دیمیر، د بلح د پوهنې رئیس مفتي محمد شریف ابو عاصم عثماني او ګڼ شمېر ښوونکو، والدینو او زده کوونکو ګډون کړی و.

په مزارشريف د توركيې جنرال قونسل کبان  په خپلو خبرو كې د دواړو هېوادونو تر منځ د ګډو تاريخي او فرهنګي ارزښتونو پر اهميت ټينګار وكړ.

کبان وویل چې له افغانستان سره د تورکیې مرستې د هر ډول حساب او تمو  سره نه دي.

"که څه هم تورکيه او افغانستان ګډې پولې نه لري، خو د دوو دوستو ګاونډيو هېوادونو په پرتله ډېرې پرمختللې اړيکې لري."

د ټیکا مزار شریف د دفتر همغږي کوونکي تاش دیمیر وویل چې دغه دفتر له ۲۰۰۵ کال راهیسې د افغانستان په شمال کې شاوخوا ۲۰۰ پروژې پلې کړي، چې تر ۶۰ ډېرې یې د پوهنې په برخه کې دي او د نوي پرانیستل شوي ښوونځي په ګډون یې په ټولیزه توګه ودانۍ جوړې کړې دي. د  نني ښوونځي په ګډون ۵۱ ښوونځیو د جوړولو سره  افغان زده کونکو ته خدمتونه وړاندې کړي.

افغان چارواکو د ټيکا او تورکيې له دې مرستې مننه وکړه.

د بلخ مرستيال والي ابو ادريس وويل "د تورکيې دولت او خلک تل له افغانانو ترڅنګ دریدلي دي، نه يوازې د پوهنې په برخه کې بلکې په هره برخه کې يې مرستې کړې دي."

له مراسمو وروسته ښوونځي په خپله نوې ودانۍ کې ښوونیز فعالیتونه پیل کړل.