უკრაინაში F-16 გამანადგურებელი თვითმფრინავი ჩამოვარდა

უკრაინაში ამერიკული წარმოების F-16 გამანადგურებელი თვითმფრინავი ჩამოვარდა.

უკრაინის გენერალური შტაბის „ტელეგრამი“-ს ანგარიშზე გაკეთებულ წერილობით განცხადებაში ნათქვამია, რომ უკრაინის კუთვნილი F-16 თვითმფრინავები 26 აგვისტოს უკრაინაზე რუსეთის ინტენსიური საჰაერო თავდასხმების დროს ფრენებს ასრულებდნენ.

განცხადებაში აღნიშნულია, რომ სარაკეტო თავდასხმის მოსაგერიებლად F-16-ები მისიას ასრულებდნენ და „საჰაერო ბრძოლის დროს F-16 თვითმფრინავებმა აჩვენეს მაღალი ეფექტურობა, მოწინააღმდეგის ოთხი ფრთოსანი რაკეტა ჩამოაგდეს“.

იქვე აღნიშნულია, რომ ერთ F-16-თან კავშირი დაიკარგა მიზანთან მიახლოებისას, „როცა ის მიუახლოვდა შემდეგ სამიზნეს, კომუნიკაცია დაიკარგა ერთ-ერთ თვითმფრინავთან. როგორც მოგვიანებით გაირკვა, თვითმფრინავი ჩამოვარდა და პილოტი დაიღუპა“.

გავრცელდა ინფორმაცია, რომ თვითმფრინავის ჩამოვარდნის ტერიტორიაზე მიზეზების გასარკვევად სპეციალური ჯგუფი გაიგზავნა.