ირანი: "ჩვენ მზად ვართ სანქციების მოხსნაზე მოლაპარაკებისთვის"

ირანის საგარეო საქმეთა მინისტრის მოადგილემ კაზემ გარიბაბადმა განაცხადა, რომ მზად არიან ეკონომიკური სანქციების მოხსნაზე მოლაპარაკებები გამართონ და შედეგების მიღწევა შესაძლებელია, თუ სხვა მხარეებსაც ექნებათ ეს ნება.

ირანის ოფიციალური საინფორმაციო სააგენტო IRNA-ს ცნობით, გარიბაბადმა პრესისთვის განცხადება გააკეთა ჟენევის კონვენციის მიღების 75 წლის იუბილეს ცერემონიაზე და თქვა: "ირანი მზად არის განაახლოს მოლაპარაკებები სანქციების მოხსნის მიზნით, როგორც ეს იყო წარსულში. ჩვენ ყოველთვის გვქონდა ეს ნება. თუ სხვა მხარეებსაც ექნებათ ეს ნება, მოლაპარაკებები გაიმართება და შედეგით დასრულდება".

გარიბაბადის თქმით, არსებობს მოლაპარაკებების განახლებისა და კონსენსუსის მიღწევისთვის შესაფერისი საფუძველი და შესაძლებლობები და რომ ეკონომიკური სანქციები უარყოფითად მოქმედებს ხალხზე, მაგრამ ვერ აღწევს მიზნებს.

ბოლო დღეებში ევროპის სამ ქვეყანასთან (გერმანია, ინგლისი და საფრანგეთი) გამართულ მოლაპარაკებებზე ირანელი ოფიციალური პირი ამბობს, რომ ისინი შეთანხმდნენ ევროპასთან მოლაპარაკებების ახალი რაუნდის გამართვაზე და კონსულტაციების გაგრძელებაზე.

„ახალი რაუნდის თარიღს ერთობლივი კონსულტაციებით დავადგენთ, მაგრამ შეთანხმება იქნა მიღწეული, რომ მოლაპარაკებები გაგრძელდება“. - თქვა გარიბაბადიმ.